އެމެރިކާ މެދުވެރިއެއްގެ ދައުރު އަދާކޮށްގެން، ޔުނައިޓެޑް އަރަބް އެމިރޭޓްސް (ޔޫއޭއީ) ގެ ވެރިރަށް އަބޫދާބީގައި ދެ ދުވަހުގެ މުއްދަތަށް ކުރިއަށްގެންދިޔަ ރަޝިއާ އަދި ޔޫކްރެއިންގެ މަޝްވަރާތައް ގައިދީން ބަދަލުކުރުމުގެ އެއްބަސްވުމަކާއެކު ބުދަ ދުވަހު ނިންމާލައިފިއެވެ. ނަމަވެސް، ފަސް އަހަރުވާން ކައިރިވެފައިވާ ހަނގުރާމަ ހުއްޓާލުމާ ގުޅޭގޮތުން މި ބައްދަލުވުމުގައި އެދެވޭ ކުރިއެރުމެއް ހޯދިފައެއް ނުވެއެވެ.

މަޝްވަރާތަކަށްފަހު ރަޝިއާގެ އިސް މަންދޫބު ވްލަޑިމީރް މެޑިންސްކީ ވިދާޅުވީ، ދެފަރާތުން ވެސް ބޮޑު އަދަދަކަށް ގައިދީން ބަދަލުކުރުމަށް އެއްބަސްވެފައިވާ ކަމަށާއި، ބައެއް ކަންކަމުގައި ދެފަރާތުގެ ދެމެދުގައި ފަހުމްވުންތަކެއް ގާއިމުކުރެވިފައިވާ ކަމަށެވެ. ރަޝިއާގެ ދައުލަތުގެ ނިއުސް އެޖެންސީ "ޓާސް" އިން ރިޕޯޓްކޮށްފައިވާ ގޮތުގައި، މި އެއްބަސްވުމުގެ ދަށުން ކުރިއަށް އޮތް ދެ ހަފުތާއާއި ތިން ހަފުތާއާ ދެމެދުގެ މުއްދަތެއްގައި ގައިދީން މިނިވަންކުރުމުގެ ކަންކަން ކުރިއަށްދާނެއެވެ.

މި މަޝްވަރާތަކުގައި ބައިވެރިވެވަޑައިގެންނެވި އެމެރިކާގެ މަންދޫބު ޖެރެޑް ކުޝްނަރ ވިދާޅުވީ، ބަދަލުކުރެވޭނެ ގައިދީންގެ އަދަދު ބުރާސްފަތި ދުވަހު ފައިނަލް ކުރެވޭނެ ކަމަށެވެ. އަދި މަޝްވަރާކުރެވުނު ކަންކަން ރަޝިއާގެ ރައީސް ވްލަޑިމީރް ޕޫޓިންއާ ހިއްސާކުރުމަށް އެމެރިކާގެ ޚާއްޞަ މަންދޫބު ސްޓީވް ވިޓްކޮފްއާއެކު މޮސްކޯއަށް ވަޑައިގަތުމަށް ހަމަޖެހިފައިވާ ކަމަށާއި، އެއަށްފަހު ޔޫކްރެއިންގެ ރައީސް ވޮލޮޑިމީރް ޒެލެންސްކީއާ ބައްދަލުކުރެއްވުމަށް އަޔަލެންޑްގެ ޑަބްލިންއަށް ދަތުރުކުރައްވާނެ ކަމަށް ކުޝްނަރ ވިދާޅުވިއެވެ.

އިޝްތިހާރު އިޝްތިހާރު

ސިޔާސީ މުހައްލިލު ދިމިތްރީ މެޑްވެޑެންކޯ ފާހަގަކުރެއްވި ގޮތުގައި، ފުޅާ ދާއިރާއެއްގެ ޑިޕްލޮމެޓިކް މަސައްކަތްތަކަކާ ނުލައިވެސް ދެ ގައުމުގެ ދެމެދުގައި އާންމުކޮށް ގައިދީން ބަދަލުކުރުމުގެ މަރުހަލާތައް ހިނގަމުންދެއެވެ. މިގޮތުން ފެބްރުއަރީ މަހު ޖެނީވާގައި ބޭއްވުނު މަޝްވަރާތަކަށްފަހު މާޗް މަހު ކޮންމެ ގައުމަކުން 200 އަސީރުން މިނިވަންކޮށްފައިވާއިރު، މިދިޔަ އަހަރު ޔޫއޭއީ އަދި ތުރުކީވިލާތް މެދުވެރިވެގެން ވެސް ބޮޑެތި އަދަދުތަކުން ގައިދީން ބަދަލުކޮށްފައިވެއެވެ.

ހަނގުރާމަ ހުއްޓާލުމަށް ވެވިދާނެ އެއްބަސްވުމެއްގެ ޝަރުތުތަކާމެދު ދެފަރާތުގެ ދެމެދުގައި ބޮޑެތި ޚިޔާލުތަފާތުވުންތަކެއް އަދިވެސް އެބަހުއްޓެވެ. ކުޝްނަރ ފާހަގަކުރެއްވި ގޮތުގައި ބިންތަކާ ގުޅޭ މައްސަލަތަކަކީ ހައްލުކުރަން އެންމެ އުނދަގޫވާނެ ކަންކަން ކަމުގައި ވިޔަސް، ހަނގުރާމައަށްފަހު ގާއިމުކުރެވޭނެ ސަލާމަތީ އޮނިގަނޑަކާ ގުޅޭގޮތުން މި ބައްދަލުވުމުގައި ވަނީ ކުރިއެރުންތަކެއް ހޯދިފައެވެ.