ދ. ރިނބުދޫގައި ގާއިމުކުރާ ޕޮލިސް ޕޯސްޓް އިމާރާތުގެ މަސައްކަތް ބާރު ސްޕީޑްގައި ކުރިއަށްދާ ކަމަށް އެމްޓީސީސީން ބުނެފިއެވެ.
މި މަސައްކަތަކީ ދިވެހި ފުލުހުންގެ ޚިދުމަތާއި އެމްޓީސީސީއާ ދެމެދު ވެވިފައިވާ އެއްބަސްވުމުގެ ދަށުން ރަށްރަށުގެ އަމާންކަން ބެލެހެއްޓުމުގެ އިމާރާތްތައް ބިނާކުރުމަށް ކުރިއަށްގެންދާ މަޝްރޫޢެކެވެ.
މި އެއްބަސްވުމުގައި ސޮއިކޮށްފައިވަނީ މިދިޔަ މާޗް މަހުގެ 14 ވަނަ ދުވަހުއެވެ.
މި އިނިޝިއޭޓިވްގެ ދަށުން އެމްޓީސީސީން ވަނީ ރާއްޖޭގެ 10 ރަށެއްގައި ޕޮލިސް ޕޯސްޓް އަދި ފަސް ރަށެއްގައި ޕޮލިސް ސްޓޭޝަން ބިނާކުރުމަށް ސޮއިކޮށްފައެވެ.
ޕޮލިސް ޕޯސްޓް އިމާރާތްކުރުމަށް ހަމަޖެހިފައިވާ 10 ރަށަކީ އދ. އޮމަދޫ، އއ. ފެރިދޫ، ބ. މާޅޮސް، ރ. ކިނޮޅަސް، ނ. ފޮއްދޫ، ހދ. ފިނޭ، ދ. ރިނބުދޫ، ރ. ފައިނު، ނ. މާފަރު އަދި ބ. ފުޅިދޫއެވެ.
އަދި ޕޮލިސް ސްޓޭޝަން އިމާރާތްކުރުމަށް ހަމަޖެހިފައިވާ ފަސް ރަށަކީ އއ. އުކުޅަސް، ދ. މީދޫ، ކ. މާފުށި، ކ. ތުލުސްދޫ އަދި ނ. މަނަދޫއެވެ.
މި މަޝްރޫޢުގެ ސަބަބުން ރާއްޖޭގެ އެކި ކަންކޮޅުތަކުގައި ޤާނޫނު ތަންފީޒުކުރުމުގެ ދާއިރާގެ އިމާރާތްތައް ތަރައްޤީވެ، މުޖުތަމަޢުގެ ރައްކާތެރިކަން އިތުރަށް ހަރުދަނާވެގެންދާނެއެވެ.
ކިޔުންތެރިންގެ ހިޔާލު