އެމެރިކާ ރައްޔިތުން މިދުވަސްވަރު ސައުދީ އަރަބިއްޔާއަށް ދަތުރުކުރާނަމަ އެކަމާމެދު އަލުން ވިސްނުމަށް ސައުދީގައި ހުންނަ އެމެރިކާ އެމްބަސީން އިރުޝާދު ނެރެފިއެވެ.
ސައުދީގައި ހުންނަ އެމެރިކާ އެމްބަސީން މިފަދަ އިރުޝާދެއް މި ނެރުނީ، މައްކާ ސަރަހައްދާއި، ސައުދީ އަރަބިއްޔާގެ އެހެނިހެން ސަރަހައްދުތަކަށް ހޫޘީން ހަމަލާ ދީފާނޭ ކަމަށް ސައުދީ ސަރުކާރުން ނެރުނު އެލަޓާ ގުޅިގެންނެވެ.
އެމްބަސީން ނެރުނު އެޑްވައިޒަރީގައި ބުނެފައިވަނީ، ސައުދީ އަރަބިއްޔާގެ ބައެއް ސަރަހައްދުތަކަށް ހޫޘީންގެ ހަމަލާތައް އަމާޒުވުމުގެ ނުރައްކާ އެބައޮތް ކަމަށެވެ. އަދި ހަމައެއައެކު ސައުދީގައި ހުރި އެމެރިކާގެ މަސްލަހަތުތަކަށް އީރާނުގެ ޑްރޯން އާއި މިސައިލް އަމާޒުކޮށް ހަމަލާ ދީފާނޭ ކަމުގެ ނުރައްކާވެސް އެބައޮތް ކަމަށްވެސް ބުނެފައި ވެއެވެ.
ޓެރަރިޒަމްގެ ނުރައްކާ އޮތުމުން، ޚާއްސަކޮށް ސައުދީ-ޔަމަން ބޯޑަރު ސަރަހައްދަށް ދަތުރު ނުކުރުމަށް އެމެރިކާ ރައްޔިތުންނަށް އެމްބަސީން އިންޒާރު ކޮށްފައި ވެއެވެ.
އެމެރިކާގެ ޚާރިޖިއްޔާއިންވެސް ވަނީ މިފަދަ ބަޔާނެއް ނެރެފައެވެ. އެގޮތުން އެމެރިކާ ރައްޔިތުން ސައުދީ އަރަބިއްޔާއަށް ދަތުރުކުރުމާ މެދު ލެވެލް 3 ގެ އިންޒާރު ނެރެފައި ވާއިރު، ޔަމަނަށް ދަތުރުކުރުމާމެދު ލެވެލް 4 ގެ އިންޒާރު ނެރެފައި ވެއެވެ.
ސައުދީ އަސްކަރިއްޔާއިން ބުނެފައިވަނީ، ޔަމަނުގެ ހޫޘީން ސައުދީ އަރަބިއްޔާއާ ދެކޮޅަށް ހިންގާ އުދުވާނުގައި މައްކާ ރީޖަންއަށާއި، މަދީނާ ރީޖަންއަށް އަމާޒުކޮށްވެސް މިސައިލްތަކެއް ފޮނުވާލި ކަމަށެވެ. ނަމަވެސް ސައުދީ ސަލާމަތީ ބާރުތަކުން އެ މިސައިލްތައް ވައްޓާލި ކަމަށް ބުނެފައި ވެއެވެ. ހޫޘީންވަނީ މިވާހަކަ ދޮގުކޮށްފައެވެ.
އަނެއްކޮޅުން، މައްކާ އަދި މަދީނާ ރީޖަންއަށް އަމާޒުކޮށް ހޫޘީން ހަމަލާތަކެއް ފޮނުވާލުމާ ގުޅިގެން އޮގަނައިޒޭޝަން އޮފް އިސްލާމިކް ކޯޕަރޭޝަނުންވަނީ އެކަން ވަރަށް ބޮޑަށް ކުށްވެރި ކޮށްފައެވެ.
ކިޔުންތެރިންގެ ހިޔާލު