ގދ. ފަރެސްމާތޮޑާގައި ނިކަމެތި ހާލުގައި ދިރިއުޅެމުންދިޔަ އުމުރުން ދުވަސްވީ މީހަކު، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ބެލުމުގެ ދަށަށް މިދިޔަ މަހުގެ 22 ވަނަ ދުވަހު ގެންގޮސްފިއެވެ.
މި މީހާ ދައުލަތުގެ ބެލުމުގެ ދަށަށް ގެންގޮސްފައިވަނީ ފަރެސްމާތޮޑާ ޕޮލިސް ސްޓޭޝަނާއި، އެ ރަށު ކައުންސިލް އަދި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީ ގުޅިގެން ކުރެވުނު މަސައްކަތުންނެވެ.
ގދ. އަތޮޅު ޕޮލިހުން ހާމަކޮށްފައިވާ ގޮތުގައި، އުމުރުން ދުވަސްވެ ގައިބާރު ދެރަވެ ނިކަމެތި ހާލުގައި އުޅުނު އެ މީހާ މިނިސްޓްރީގެ ބެލުމުގެ ދަށަށް ގެންދިއުމުގެ ކުރިން، އެފަރާތުގެ ހާލަތު ދުވަހުން ދުވަހަށް ވަރަށް ގާތުން ބަލައި މޮނީޓާކުރުމުގެ މަސައްކަތް ފަރެސްމާތޮޑާ ޕޮލިސް ސްޓޭޝަނުން އިސްނަގައިގެން ވަނީ ކޮށްފައެވެ.
އަދި މިނިސްޓްރީއާ ހަވާލުކުރުމާ ހަމައަށް އެ ފަރާތުގެ ކެއިންބުއިމުގެ އެންމެހައި އިންތިޒާމުތައް ހަމަޖައްސައިދީފައިވަނީ ފަރެސްމާތޮޑާ ކައުންސިލް އިދާރާގެ ފަރާތުން ކަމަށް ފުލުހުން މައުލޫމާތު ދެއެވެ.
މިކަމާ ގުޅޭގޮތުން ފަރެސްމާތޮޑާ ކައުންސިލްގެ ރައީސް މުޙައްމަދު ސޮބާހު ވިދާޅުވީ، އެމީހާ އެ ހާލުގައި އުޅޭތާ އަހަރުތަކެއް ވެފައިވާ ކަމަށާއި އޭނާގެ ސިއްހީ ހާލަތުވެސް ރަނގަޅު ނޫން ކަމަށެވެ.
ސޮބާހު ވިދާޅުވި ގޮތުގައި އެ މީހާގެ އުމުރު 70 އަހަރަށްވުރެ މަތިވާނެ ކަމަށް ލަފާކުރެވޭއިރު، އޭނާ ދިރިއުޅެމުންދިޔައީ ގޭގައި އެކަނި ކަމަށެވެ. އަދި ސިއްހީ ހާލަތު ހުރި ގޮތުން އެކަނި އުޅެން ދަތިވެފައިވާތީ، ޖެންޑާ މިނިސްޓްރީގެ ބެލުމުގެ ދަށަށް ގެންދަންދެން ކައުންސިލުން ދެެވެން އޮތް ټول އެހީތެރިކަމެއް ފޯރުކޮށްދެމުން ދިޔަ ކަމަށްވެސް އޭނާ ވިދާޅުވިއެވެ.
އެ ރަށުން މައުލޫމާތު ދިން ފަރާތަކުން ބުނެފައިވަނީ، އުމުރުން ދުވަސްވީ އެ މީހާގެ ދަރިންނާއި އާއިލާގެ އެހެން މީހުން ތިބި ނަމަވެސް، އެއިން އެއްވެސް ފަރާތެއްގެ އެހީތެރިކަމެއް އޭނާއަށް ލިބެމުން ނުދާ ކަމަށެވެ.
ކިޔުންތެރިންގެ ހިޔާލު