މޯލްޑިވްސް އިސްލާމިކް ބޭންކް، އެމްއައިބީން ބ. އަތޮޅުގެ 4 ރަށެއްގައި އޭޓީއެމްގެ ހިދުމަތް ދޭން ފަށައިފިއެވެ.
އެމްއައިބީން އޭޓީއެމްގެ ހިދުމަތް ފަށާފައިވަނީ އޭދަފުށި، ކެންދޫ، ގޮއިދޫ އަދި ތުޅާދޫގައެވެ.
މި ރަށްރަށުގައި އޭޓީއެމް ހިދުމަތް އިފްތިތާހުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ މާލީ ކަންކަމާއި ސަރުކާރުގެ ކުންފުނިތަކާ ބެހޭ ވަޒީރު ހަސަން ޒަރީރެވެ.
މި ރަސްމިއްޔާތުގައި ރާއްޖޭގެ ހުރިހާ ހިސާބަކަށް ހަމަހަމަ ގޮތެއްގައި މާލީ ހިދުމަތްތައް ފޯރުކޮށްދިނުން ފުޅާ ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުގެ ސިޔާސަތުގެ މައި ތަނބެއް ކަމަށާއި، ރާއްޖޭގެ ހުރިހާ ސަރަހައްދެއްގެ ރައްޔިތުންނަށް ބޭންކިން އަދި މާލީ ހިދުމަތްތަކުން ފައިދާ ލިބިގަތުމުގެ ފުރުސަތު ކަށަވަރު ކޮށްދިނުމަށް ސަރުކާރުން ވަރަށް ބޮޑު އިސްކަމެއް ދެއްވާ ކަމަށް ވަޒީރު ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާހުކޮށްދެއްވި ނޭޝަނަލް ފައިނޭންޝަލް އިންކްލޫޝަން ސްޓްރެޓެޖީ 2026–2030 ގެ މުހިންމުކަން ފާހަގަކުރައްވަމުން ވަޒީރު ވިދާޅުވީ އެ ސިޔާސަތު ގެ ފަސް މައި ތަނބުގެ ތެރޭގައި ޝަރީއަތާ އެއްގޮތްވާ ގޮތުން ހިންގޭ އިސްލާމިކް ފައިނޭންސް ހިމެނޭކަމަށެވެ. ފައިނޭންސިންއަށް ވާސިލްވުމުގެ ފުރުސަތު ފަހިކޮށްދިނުމާއި، ޑިޖިޓަލް ފައިނޭންޝަލް ޚިދުމަތްތައް ފުޅާ ކުރުމާއި، ތިމާވެއްޓާ ރައްޓެހި ދެމެހެއްޓެނިވި ފައިނޭންޝަލް ނިޒާމެއް ބިނާ ކުރުމާއި، ކަސްޓަމަރުންގެ ހާލަތު ރަނގަޅު ކުރުމާއި، ފައިނޭންޝަލް ލިޓަރަސީ ކުރިއެރުވުން ވެސް ސްޓްރެޓެޖީގެ ތެރޭގައި ހިމެނޭ ކަމަށް ވަޒީރު ވިދާޅުވިއެވެ.
ސްޓްރެޓެޖީ އެކުލަވާލުމަށް ކުރި ދިރާސާތަކަށް އަލިއަޅުއްވާލައްވަމުން ވިދާޅުވީ، މާލީ ހިދުމަތްތައް ތައާރަފު ކުރިކަމުގައިވިޔަސް، ރައްޔިތުންނަށް އެ ހިދުމަތްތަކުގެ ބޭނުން ފުރިހަމައަށް ހިފެމުން ނުދާކަމަށެވެ. މި ދިރާސާއިން ދައްކާ ގޮތުގައި، ދިވެހި އަންހެނުންގެ 14 އިންސައްތަ އާއި ފިރިހެނުންގެ 5 އިންސައްތަ ބޭންކިން ނިޒާމުގެ ބޭރުގައި ތިބިއިރު، އިންޓަނެޓް ބޭންކިން ބޭނުން ކުރަނީ އުމުރުން ދުވަސްވީ ފަރާތްތަކުގެ ތެރެއިން އެންމެ 38 އިންސައްތަ ކަމަށެވެ.
“މިކަމުން އަންގައިދެނީ މާލީ ހިދުމަތްތަކުގެ ފުރިހަމަ ބޭނުން ރައްޔިތުން ހިފާ މިންވަރު އިތުރުކުރުމުގެ ޖާގަ އެބައޮތްކަން،” ވަޒީރު ވިދާޅުވިއެވެ.
ފައިނޭންޝަލް ލިޓަރަސީ ކުރިއެރުވުމަށާއި ކަސްޓަމަރުން ބާރުވެރި ކުރުވުމަށް، ސަރުކާރުން އެމް.އައި.ބީ ފަދަ މާލީ މުއައްސަސާތަކާ ގުޅިގެން މަސައްކަތް ކުރާނެ ކަމަށާއި، ލިބެން ހުރި ބޭންކިން ހިދުމަތްތަކުގެ ފުރިހަމަ ބޭނުން ހިފޭ ފަދަ ގޮތަށް ރައްޔިތުންނަށް އެ ހިދުމަތް ފޯރުކޮށްދިނުމުގައި ސަރުކާރުން ދެމި ތިބޭނެ ކަމަށް ވިދާޅުވިއެވެ.
ބ. އަތޮޅަކީ ޔުނެސްކޯ ބަޔޮސްފިއާ ރިޒާވެއް ކަމަށްވާއިރު، ފަތުރުވެރިކަމުގެ ދާއިރާގައި ގައުމީ ފެންވަރުގައި ވަރަށް ބޮޑު ދައުރެއް އަދާ ކުރާ ސަރަހައްދެއް ކަން ފާހަގަ ކުރައްވަމުން، ފަތުރުވެރިކަމާ ގުޅިފައިވާ ވިޔަފާރިތަކަށާއި، އެ ސަރަހައްދުގެ އިގްތިސާދީ ހަރަކާތްތަކަށް މި ހަތަރު ރަށުގައި ގާއިމުކުރެވުނު އެމްއައިބީގެ ގޮފިތަކާ އެކު އިތުރު ކުރިއެރުން އަންނާނެކަމަށް ވަޒީރު ވިދާޅުވިއެވެ.
ވަޒީރުގެ ވާހަކަފުޅު ނިންމަވާލެއްވީ ރާއްޖޭގެ ހުރިހާ ހިސާބަކަށް ޒަރޫރީ މާލީ ހިދުމަތްތައް ފުޅާކުރުން ކުރިއަށް ގެންދިއުމަށް އެމްއައިބީ އަދި އެހެނިހެން މާލީ މުއައްސަސާތަކުން ކުރައްވަމުންގެންދަވާ މަސައްކަތްތައް ފާހަގަކުރައްވައި، އެކަމަށް ކުރެވޭ ކޮންމެ މަސައްކަތަކަށްވެސް ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބިގެންދާނެ ކަމުގެ ޔަގީންކަން ދެއްވަމުންނެވެ.
ކިޔުންތެރިންގެ ހިޔާލު