އަހަރުގެ މިހާތަނަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ވެބްސައިޓް މެދުވެރިކޮށް ވަޤުފު ފަންޑަށް ތިން މިލިއަނަށް ވުރެ ގިނަ ރުފިޔާ ލިބިއްޖެއެވެ.
މިކަން ހާމަކުރައްވައި އިސްލާމީ ކަންތައްތަކާ އައުޤާފާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ އިސްލާމީ ކަންތައްތަކަށް އެހީވާ ވަޤުފު ފަންޑު ތަރައްގީކޮށް، ފަންޑަށް އެހީވުމަށް މީރާގެ ވެބްސައިޓްތެރެއިން ވަޤުފުކުރުމާއި ޞަދަޤާތްކުރުމަށް ގާއިމުކުރެވުނު ލިންކުތަކުން އަހަރު މިހާތަނަށް ތިން މިލިއަނަށް ވުރެ ގިނަ ރުފިޔާ ލިބިފައިވާކަމަށެވެ.
މިފައިސާ ހަރަދުކުރަނީ ވަޤުފު ފަންޑުގެ ޓްރަސްޓް ސްޓޭޓްމަންޓްގައި ބަޔާންވެގެންވާ ކަންކަމަށް، ވަޤުފު ފަންޑުގެ އުސޫލުގައިވާ ގޮތުގެ މަތިންކަމަށް ވަޒީރު ވިދާޅުވިއެވެ.
ވަޤުފް ފަންޑަކީ އިސްލާމީ ކަންތައްތަކާ އައުޤާފާ ބެހޭ ވުޒާރާއިން ދިވެހިރާއްޖޭގައި ދީނީ އަދި އިޖުތިމާއީ ކަންކަމަށް ފައިސާ ހޯދުމަށާއި، ވަޤުފްގެ ނިޒާމު ފުޅާކޮށް ތަރައްގީކުރުމަށް ހިންގާ ހާއްސަ ފަންޑެކެވެ. މި ފަންޑުގެ ތެރެއިން މިހާރު ވެސް އަންނަނީ މިސްކިތްތަކާއި ދީނީ މަރުކަޒުތައް ބިނާކުރުމާއި އެފަދަ ތަންތަނުގެ މަރާމާތުގެ މަސައްކަތްތައް ވެސް ކުރަމުންނެވެ. އަދި ފަގީރުންނާއި މިސްކީނުންނަށް އެހީތެރިކަން ފޯރުކޮށްދީ، ތައުލީމީ އަދި ސިއްހީ އެހީތެރިކަމަށް ބޭނުންވާ މީހުންނަށް ވެސް ފަންޑު މެދުވެރިކޮށް އަންނަނީ އެހީތެރިކަން ފޯރުކޮށްދެމުންނެވެ.
ރައީސުލްޖުމުހޫރިއްޔާ ޑރ މުޙައްމަދު މުޢިއްޒުގެ ރިޔާސީ މެނިފެސްޓޯގައި ހިމެނޭ އިސްލާމީ ވައުދުތަކުގެ ތެރެއިން މުހިންމު އެއް ވައުދަކީ ވަޤުފު ފަންޑުގެ މަޝްރޫއުތައް ފުޅާކުރުމުގެ ވައުދެވެ. އޭގެ ބޭނުމަކީ އިސްލާމީ ހިދުމަތްތަކަށް ހޭދަކުރަން ބޭނުންވާ ފައިސާ ހޯދުމެވެ.
ކިޔުންތެރިންގެ ހިޔާލު