ދުނިޔެއަށް ކުރިމަތިވި ގިނަ ކްރައިސިސްތަކުގައި ސަރުކާރުގައި މަސައްކަތް ކުރެއްވުމުގެ ތަޖުރިބާ ލިބިވަޑައިގެންފައިވާ ކަމަށާއި ނަމަވެސް މިވަރަށް ރާއްޖޭގެ އިގްތިސޯދަށް ގޮންޖެހުން ބޮޑުވި ދުވަސްވަރެއް މީގެ ކުރިން ނާންނަ ކަމަށް ސްޓޭޓް ޓްރޭޑިން އޯގަނައިޒޭޝަންގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.
އިކޮނޮމިކް މިނިސްޓްރީން އިންތިޒާމުކޮށްގެން އިގްތިސޯދީ މައުލޫމާތުތައް ހިއްސާކުރުމަށް ބޭއްވި ޕެނަލް ޑިސްކަޝަންގައި ވާހަކަދައްކަވަމުން އެސްޓީއޯގެ މެނޭޖިން ޑިރެކްޓަރު ވިދާޅުވީ ދެ ހާސް އަށެއްގެ ފައިނޭންޝަލް ކްރައިސިސް އައިއިރު އެމަނިކުފާނު މަސައްކަތް ކުރެއްވީ ފިނޭންސް މިނިސްޓްރީގެ ދަރަނި ބެލެހެއްޓެވުމުގެ އިސް ވެރިއެއްގެ ގޮތުގައި ކަމަށެވެ. އަދި އޭރުގެ ހާލަތާ އަޅާބަލާއިރު ދުނިޔޭގެ މަޝްރަހަށް މިހާރު ކުރިމަތިވެފައިވާ ގޮންޖެހުންތައް މާ ބޮޑުކަން އޭނާ ފާހަގަކުރެއްވިއެވެ.
އެސްޓީއޯގެ މެނޭޖިން ޑިރެކްޓަރު ވިދާޅުވި ގޮތުގައި އެމެރިކާއާއި އީރާނުގެ ހަނގުރާމައިގެ ސަބަބުން ތަކެތީގެ އަގުތައް އުފުލިގެން ދިޔައީ ނުހަނު ބޮޑަށެވެ. ހާއްސަކޮށް މުދާ އުފުލުމާ ގުޅުންހުރި ހަރަދުތައް އިންތިހާއަށް އުފުލިގެން ދިޔަކަން އޭނާ ފާހަގަކުރެއްވިއެވެ.
ހަނގުރާމަ ފެށުނު ދުވަހުން Pat ވެގެން މުދާ އުފުލާ ބޯޓުތަކުން އިންޝުއަރެންސް ދިނުން ހުއްޓާލުމުން، ދެން ޖެހުނީ އަގުބޮޑު ވޯ ރިސްކް އިންޝުއަރެންސް ނަގަން ކަމަށް ޝިމާދު ވިދާޅުވިއެވެ. އެ ޕޮލިސީ ވިއްކީ ހަފުތާއަކަށް ކަމަށްވާތީ، ރާއްޖެއިން އޯމާންއާއެކު ތެލުގެ ވިޔަފާރި ކުރާއިރު ކޮންމެ ހަފުތާއަކު އެ އިންޝުއަރެންސް ނަގަން ޖެހުނު ކަމަށް އޭނާ ވިދާޅުވިއެވެ. މީގެ ކުރިން ބޯޓު ޗާޓަރު ކުރަން ހަ ލައްކަ އެމެރިކާ ޑޮލަރު ހަރަދުވި ނަމަވެސް، އެ އަގު ނުވަ ލައްކަ ފަންސާސް ހާސް ޑޮލަރަށް އުފުލި، ފަންސާސް އިންސައްތައިގެ އިތުރުވުމެއް އައިކަން އޭނާ ހާމަކުރެއްވިއެވެ. މިއީ ރާއްޖެއިން ކުރި ކަމެއް ނޫން ކަމަށާއި ނަމަވެސް އިގްތިސޯދީ ގޮތުން މި ހަރަދުތައް އުުފުލަން ޖެހުނު ކަމަށް އޭނާ ވިދާޅުވިއެވެ.
މިފަދަ ނާޒުކު ހާލަތެއްގައި ރާއްޖެއަށް ކުރިމަތިވި ގިނަ ގޮންޖެހުންތަކުން ސަލާމަތްވުމަށް ދުރާލާ ސަރުކާރުން ކުރެއްވި މަސައްކަތްތަކުން ބޮޑު އެހީތެރިކަމެއް ލިބުނު ކަމަށް ޝިމާދު ވިދާޅުވިއެވެ. އެގޮތުން ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ކްރައިސިސް ކޮމެޓީއެއް އުފައްދަވައި، އެ ކޮމެޓީގެ ބެލުމުގެ ދަށުން ތެލާއި ކާބޯތަކެތި ހުސްވިޔަ ނުދީ ލިބޭނެ އިންތިޒާމުތައް ހަމަޖެއްސެވިކަން އޭނާ ފާހަގަކުރެއްވިއެވެ.
ދުނިޔޭގެ ގިނަ ގައުމުތަކުން ތެލުގެ ބާވަތްތައް ހުސްވި އިރު، ޔޫރަޕުގެ ބައެއް ގައުމުތަކުގައި ތެޔޮ ހުސްވެގެން ފްލައިޓްތައް ހުއްޓާލަން ޖެހުނު ކަމަށް ޝިމާދު ވިދާޅުވިއެވެ. ނަމަވެސް ރާއްޖެއަށް ބަރާބަރަށް ތެޔޮ ގެނެވުނު ކަމަށާއި، އެސްޓީއޯއާއި އަމިއްލަ ފަރާތްތައް ގުޅިގެން ރަނގަޅަށް އިންތިޒާމުކުރުމުގެ ސަބަބުން ރާއްޖެ ތެލަށް ޖެހުނަނުދީ ހިފެހެއްޓުނު ކަމަށް އޭނާ ވިދާޅުވިއެވެ.
ރާއްޖެއާ އަވައްޓެރި ގައުމުތަކުގެ ހާލަތަށް އަލިއަޅުއްވާލައްވަމުން ޝިމާދު ވިދާޅުވީ އިންޑިއާ ފަދަ ގައުމުތަކުން އާންމުންނަށް ތެޔޮ ވިއްކުން ލިމިޓްކޮށް، ބައެއް ވަގުތުތަކުގައި ތެޔޮ ވިއްކުން މުޅިން ހުއްޓާލި ނަމަވެސް ރާއްޖޭގައި އެފަދަ ފިޔަވަޅެއް އަޅަން ނުޖެހޭ ކަމަށެވެ. އަދި ބޭރުގެ ބައެއް ރެސްޓޯރެންޓްތަކުން ހިދުމަތް ނުދެވިގެން ބަންދުކުރަން ޖެހުނު ނަމަވެސް، މާތްﷲގެ އިރާދަފުޅުން ރާއްޖެއަށް އެފަދަ ދަތި އުނދަގޫ ހާލަތަކާ ކުރިމަތިލާން ނުޖެހި ސަލާމަތްވެވުނު ކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު