ރާއްޖޭގައި ބޮޑެތި އިންވެސްޓްމެންޓުތައް ކުރާ ފަރާތްތަކަށް ހާއްސަކޮށްގެން ސަރުކާރުން ތައާރަފުކުރާ “ޕާލް ރެސިޑެންސީ” ވިސާ ޕްރޮގްރާމް ހުއްޓުވަން އިދިކޮޅު އެމްޑީޕީގެ ޕާލަމެންޓްރީ ގްރޫޕުން މަޖިލީހަށް ގަރާރެއް ހުށަހެޅި ނަމަވެސް، އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު އެ ޕްރޮގްރާމަށް ތާއީދު ކުރައްވައިފިއެވެ.
ރައީސް ޑރ. މުހައްމަދު މުއިއްޒު ސިންގަޕޫރަށް ކުރެއްވި ރަސްމީ ދަތުރުފުޅުގެ ތެރެއިން، ދުނިޔޭގެ މަޝްހޫރު ކުންފުންޏެއް ކަމަށްވާ ހެންލީ އެންޑް ޕާޓްނާސްއާ ހަވާލުކޮށްގެން ފަށާ މި ޕްރޮގްރާމަކީ، ރާއްޖޭގައި އިންވެސްޓްކޮށް ދިގު މުއްދަތަކަށް ދިރިއުޅުމުގެ ފުރުސަތު ބޭރުގެ އިންވެސްޓަރުންނަށް ފަހިކޮށްދޭ ޕްރޮގްރާމެކެވެ.
މި ޕްރޮގްރާމާ ގުޅޭގޮތުން އެމްޑީޕީގެ ޕާލަމެންޓްރީ ގްރޫޕުން ހުށަހެޅި ގަރާރުގައި، މިއީ ގައުމީ ސަލާމަތާއި ދައުލަތުގެ މާލީ ސިޔާދަތަށް ނުރައްކާވެދާނެ ކަމެއް ކަމަށް ބުނެފައިވެ އެވެ. ހުޅުމާލޭ ދެކުނު ދާއިރާގެ މެންބަރު އަހްމަދު ޝަމްހީދު ހުށަހެޅުއްވި މި ގަރާރުގައި ވަނީ، މިފަދަ މަޝްރޫއުތަކުގެ ސަބަބުން ދައުލަތުގެ ތެރޭގައި ވަކި ބާރުތަކެއް ލިބިފައިވާ “ވަކި ދައުލަތެއް” އުފެދިދާނެ ކަމުގެ ބިރު އެބަ އޮތް ކަމަށް ފާހަގަކޮށްފަ އެވެ. އަދި ވަކި ގާނޫނެއް ފާސްކުރަންދެން މި ޕްރޮގްރާމް ހުއްޓާލުމަށް ވެސް އެ ގަރާރުގައި ގޮވާލާފައިވެ އެވެ.
ނަމަވެސް، މި ޕްރޮގްރާމަށް ތާއީދު ކުރައްވައި ރައީސް ނަޝީދު ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، މިއީ ރާއްޖޭގެ އިގްތިސާދަށް ނުހަނު ފައިދާހުރި، ޓޫރިޒަމްގެ އާ ބާވަތެއްގެ ވިޔަފާރީގެ ފުރުސަތެއް ކަމަށް ފެނިވަޑައިގަންނަވާ ކަމަށެވެ.
ސަރުކާރުން ބުނާ ގޮތުގައި މި ޕްރޮގްރާމަކީ ރާއްޖޭގެ އިގްތިސާދު ސިންދަފާތުކޮށް، ބޭރު ފައިސާ ލިބޭ މިންވަރު އިތުރުކުރުމަށް ކުރާ ވަރަށް މުހިންމު މަސައްކަތެކެވެ. އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވިދާޅުވެފައި ވަނީ، މިކަން ކުރިއަށް ގެންދާނީ އެންމެ މަތީ ފަންތީގެ ލަގްޒަރީ ރެސިޑެންސީ މާކެޓުކޮށްދޭ ވަރުގަދަ ފަރާތްތަކާ ގުޅިގެން ކަމަށެވެ.
ކިޔުންތެރިންގެ ހިޔާލު