އިދިކޮޅު އެމްޑީޕީގެ ކޮންގްރެސްގެ ރިޔާސަތުގައި އިންނަވައި، ކޮންމެ ސިކުންތެއްގައި ވެސް ދައުލަތާ ހަވާލުވުމަށް ތައްޔާރަށް ހުންނެވި ކަމަށް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ކޮންގްރެސްގެ ރިޔާސަތުގައި އިންނެވި ނަޝީދު މިހެން ވިދާޅުވީ، އެ ޕާޓީގެ ގައުމީ މަޖިލިސް މެންބަރު އަދި ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް ދެއްކެވި ވާހަކަފުޅަކާ ގުޅިގެންނެވެ.
އެމްޑީޕީގެ އަސާސީ ގަވާއިދަށް ހުށަހަޅާފައިވާ އިސްލާހުތަކަށް ބަހުސްކުރައްވަމުން ސަލީމް ވިދާޅުވީ، އެ ޕާޓީގެ އިދާރީ އޮނިގަނޑު ރޭވިފައި އޮންނަންވާނީ ކޮންމެ ވަގުތެއްގައި ވެސް ސަރުކާރާ ހަވާލުވެވޭ ފަދަ އިންތިޒާމަކުން ކަމަށެވެ.
މިހާރު ހިނގަމުންދާ ޕީއެންސީގެ ސަރުކާރު ފަދަ ނޭއްގާނީ ސަރުކާރުތައް އޮންނަ ވަގުތުތަކުގައި، ކޮންމެ ވަގުތެއްގައި ވެސް ވެރިކަމާ ހަވާލުވުމަށް ރައްޔިތުން އަންގަފާނެ ކަމަށް ސަލީމް ފާހަގަކުރެއްވިއެވެ. އަދި ޕާޓީގެ އޮނިގަނޑު ދައުލަތުގެ ހިންގުމާ އެއްގޮތަށް އިންތިޒާމުކުރުމަކީ މާދަމާ ވެސް ވެރިކަމާ ހަވާލުވާން ފަސޭހަވެގެންދާނެ ކަމެއް ކަމަށް އޭނާ ވިދާޅުވިއެވެ.
ކުރިއަށް އޮތް އެމްޑީޕީ ރިޔާސީ ޕްރައިމަރީގައި ފަހު ވަގުތު ނަޝީދު ބައިވެރިވެވަޑައިގަންނަވާނެ ކަމަށް ގިނަ ބަޔަކު ގަބީލުކުރެއެވެ.
ކިޔުންތެރިންގެ ހިޔާލު