އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ދުނިޔޭގެ ބޮޑެތި ބާރުތަކުންނާއި މެދުފަންތީގެ ބާރުތަކުން މި ސަރަހައްދަށް އަސްކަރީ ގާބިލުކަން އިތުރުކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މެދުއިރުމަތީގެ މަސްލަހަތު ގޯސްވެ ބައިނަލްއަގުވާމީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާ މި ދަނޑިވަޅުގައި، ރާއްޖޭގެ ކަނޑުގެ ސަރަހައްދަށް އޮތް ނުރައްކާ ބޮޑުވަމުންދާ ކަމަށް ނަޝީދު ފާހަގަކުރެއްވިއެވެ. ހޯރްމޫޒް ކަނޑުއޮޅިއާއި، ބާބުލް މަންދަބް އަދި ރަތްކަނޑަށް ވަންނަ ދޮރާށި ބަންދުވުމަށްފަހު އަލުން ހުޅުވިއްޖެ ނަމަ، ހަނގުރާމަވެރި ޖަމާއަތްތަކުން ރާއްޖޭގެ ހުވަދޫ ކަނޑާއި ކާށިދޫ ކަނޑު ބަންދުކުރުމުގެ ފުރުސަތު އޮތް ކަމަށް އެމަނިކުފާނު ވިދާޅުވިއެވެ.
ރާއްޖޭގެ ރައްކާތެރިކަމަށްޓަކައި އިންޑިއާއަށާއި އެހެނިހެން އެކުވެރި ގައުމުތަކަށް ބަރޯސާވާންޖެހޭ މިންވަރު ބޮޑުކަން ފާހަގަކުރައްވަމުން، އިންޑިއާއާއެކު މާނަހުރި މަޝްވަރާތަކެއް ކުރުމަށް ނަޝީދު ގޮވާލެއްވިއެވެ. ރަތްކަނޑާއި ގަލްފް ސަރަހައްދު ބަންދުވުމުގެ ސަބަބުން ދުނިޔޭގެ ވިޔަފާރީގެ އާ މަގުތައް ހޯދަމުންދާއިރު، އެފްރިކާ އާއި އިންޑިއާ ކަނޑުގެ ވިޔަފާރި މަގުތަކުން ރާއްޖެއަށް އާ ފުރުސަތުތަކެއް ލިބިގެންދާނެ ކަމަށް ވެސް އެމަނިކުފާނު ލަފާކުރެއްވިއެވެ.
ކާށިދޫ ކަނޑާއި ހުވަދޫ ކަނޑަކީ މަދު ބަޔަކަށް ވެސް ހުރަސްއެޅިދާނެ ފަދަ ނާޒުކު ސަރަހައްދުތަކެއް ކަމަށާއި، އެފަދަ ނުރައްކާތައް ހުއްޓުވުމުގެ ގާބިލުކަން ރާއްޖޭގެ ކައިރި ކަނޑުފަޅުގައި ގާއިމުކުރަންޖެހޭ ކަމަށް ނަޝީދު ވިދާޅުވިއެވެ. އަދި ރާއްޖޭގައި ހަރުކަށި ފިކުރު ފެތުރުމާއި ހަނގުރާމަވެރި ޖަމާއަތްތައް އުފެދުން ހުއްޓުވުމަށް ހާއްސަ ސަމާލުކަމެއް ދޭންޖެހޭ ކަމަށް އެމަނިކުފާނު ފާހަގަކުރެއްވިއެވެ.
އިންޑިއާ ކަނޑުގައި ހަމައެކަނި ހަތިޔާރު ބޭނުންކޮށްގެން ހުރިހާ މައްސަލައެއް ހައްލުނުވާނެ ކަމަށާއި އެންމެ މުހިންމު ކަމަކީ މުޖުތަމައު ރަނގަޅަށް ބަލަހައްޓައި ސުލްހަވެރިކަމާއެކު ދިރިއުޅުމުގެ މާހައުލެއް ގާއިމުކުރުން ކަމަށް ނަޝީދު ވިދާޅުވިއެވެ.
ކިޔުންތެރިންގެ ހިޔާލު