ކުރިއަށް އޮތް ދޮޅު އަހަރެއްހާ ދުވަހުގެ ތެރޭގައި ރާއްޖޭގައި ސްމާޓް އައިޑީ ކާޑު ތައާރަފުކޮށް، އެ ކާޑު ބޭނުންކޮށްގެން ފައިސާ ދެއްކޭނެ އިންތިޒާމު ހަމަޖައްސަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ދައުލަތުގެ މީޑިއާއިން ކުރިއަށް ގެންދިޔަ “ނޭޝަން ޗެޓް” ޕްރޮގްރާމްގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުގެ އަމާޒަކީ 2030 ވަނަ އަހަރު އަންނަ އިރު، ރާއްޖޭގެ އުފެއްދުންތެރިކަމުގެ 15 އިންސައްތަ ހިއްސާކުރާ ދާއިރާއަކަށް ޑިޖިޓަލް އިގްތިސާދު ހެއްދެވުން ކަމަށެވެ.
މި ބޮޑު މަޝްރޫޢުގެ ދަށުން “މޯލްޑިވްސް 2.0” ގެ ތަސައްވުރާ އެއްގޮތަށް އެކި ދާއިރާތައް ޑިޖިޓަލް ކުރެވިގެންދާނެ ކަމަށް ރައީސް ވިދާޅުވިއެވެ. އަދި ސްމާޓް އައިޑީ ކާޑު ތައާރަފް ކުރުމަކީ މި މަޝްރޫޢުގެ އެންމެ މުހިންމު އެއް ބައި ކަމަށް ވެސް އެމަނިކުފާނު ފާހަގަކުރެއްވިއެވެ. މި މަސައްކަތަށް ބޭނުންވާ ގާނޫނީ އޮނިގަނޑު އެކުލަވާލުމަށްޓަކައި މިހާރު ރައްޔިތުންގެ މަޖިލީހަށް ބިލެއް ފޮނުއްވާފައިވާ ކަމަށް ވެސް ރައީސް މުއިއްޒު ހާމަކުރެއްވިއެވެ.
މި ޕްރޮގްރާމްގެ ކާމިޔާބީއަށްޓަކައި ދައުލަތުގެ ހުރިހާ މުއައްސަސާތަކާއި، ސަރުކާރު ހިއްސާވާ ކުންފުނިތަކުގެ އިތުރުން، ބޭންކް އޮފް މޯލްޑިވްސް (ބީއެމްއެލް) ހިމެނޭހެން ރާއްޖޭގައި ހިންގާ ބޭންކުތަކުން ވެސް މި ކަމުގައި ބައިވެރިވާން ޖެހޭނެ ކަމަށް ރައީސް ވިދާޅުވިއެވެ. ސްމާޓް އައިޑީ ކާޑަކީ ފިންގާޕްރިންޓާއި ޗިޕް ހިމެނޭ ގޮތަށް ފަރުމާކުރެވޭ ކާޑެކެވެ. ރައީސް ވިދާޅުވީ މި ކާޑުގެ އެހީގައި ޕޭމަންޓްތައް ދެއްކުމުގެ އިތުރުން، އަމިއްލަ ރެކޯޑްތައް ބެލެހެއްޓުމާއި އެކި މުއައްސަސާތަކުން ހިދުމަތް ހޯދުމުގައި ރައްޔިތުންނަށް ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ.
ރައީސް ވިދާޅުވި ގޮތުގައި، އަތުގައި އޮންނާނީ ފިޒިކަލް އައިޑީކާޑެއް ނަމަވެސް، އައިޑީކާޑުގެ ބާވަތް ޑިޖިޓަލައިޒްކޮށް، ސްމާޓްކޮށް ބަދަލުވެގެންދާނެއެވެ. އަދި އޭގެއިން ގާތްގަނޑަކަށް ހުރިހާ ކަމެއް ކުރެވޭ ކަހަލަ ޕޭމަންޓް ދެއްކުން ވިޔަސް ހުރިހާ ކަމެއް ވެސް ކުރެވޭ ގޮތަށް މި ބަދަލުތައް އަންނާނެ ކަމަށް އެމަނިކުފާނު ވިދާޅުވިއެވެ. މި ބަދަލުގެ އެންމެ ބޮޑު ބޭނުމަކީ މުޅި ރާއްޖެއިން ކޮރަޕްޝަން ނައްތާލައި، ރައްޔިތުންނަށް ދެފުށް ފެންނަ ގޮތެއްގައި ފަސޭހަ ޚިދުމަތްތަކެއް ފޯރުކޮށްދިނުމެވެ. ސަރުކާރުގެ އަމާޒަކީ ދައުލަތުން ފޯރުކޮށްދޭ ހުރިހާ ހިދުމަތަކީ ވެސް ކޮންމެ ރަށެއްގެ ކޮންމެ ތަނެއްގައި ހުރެގެން ވެސް ފަސޭހަކަމާއެކު ހޯދޭނެ ޚިދުމަތްތަކަކަށް ހެދުމެވެ.
ސަރުކާރުގެ ޑިޖިޓަލައިޒޭޝަން ސިޔާސަތު ތަންފީޒުކުރުމަށް ހިންގާ “މޯލްޑިވްސް 2.0” މަޝްރޫޢު ރައީސް އިފްތިތާޙްކޮށްދެއްވީ މިދިޔަ އަހަރުގެ މެއި މަހުގެ 9 ވަނަ ދުވަހެވެ. މިއީ ދައުލަތުގެ ހުރިހާ މުއައްސަސާތައް ގުޅިގެން މަސައްކަތްކޮށް، ޑިޖިޓަލް ދާއިރާއިން ރާއްޖެއަށް އިންގިލާބީ އަދި އިސްލާހީ ބަދަލުތަކެއް ގެނައުމަށް ސަރުކާރުން އިފްތިތާޙްކުރި ޕްރޮގްރާމެކެވެ. މިއީ ސަރުކާރުގެ ޑިޖިޓަލް ޓްރާންސްފޮމޭޝަން ސިޔާސަތު ތަންފީޒުކުރުމަށް ކުރިއަށް އޮތް ތިން އަހަރަށް ހިންގުމަށް ހަމަޖެހިފައިވާ މުހިންމު މަޝްރޫޢެކެވެ.
ކިޔުންތެރިންގެ ހިޔާލު