ސްރީ ލަންކާއަށް އެއް ކިލޯއަށްވުރެ ގިނަ މަސްތުވާތަކެތި އެތެރެކޮށް، އެ ގައުމުގައި އޭގެ ވިޔަފާރިކުރަން އުޅުނު ކަމުގެ ތުހުމަތުގައި ދެ ދިވެއްސަކު ލަންކާ ފުލުހުންގެ ބަންދަށް ގެންގޮސްފިއެވެ.
މި ދެ މީހުން އަތުން ޖުމްލަ އެއް ކިލޯއަށްވުރެ ގިނަ ކްރިސްޓަލް މެތް ނުވަތަ އައިސް ފެނިފައިވާއިރު، ތަހުގީގަށްޓަކައި އެ މީހުން 14 ދުވަހަށް ބަންދުކުރުމަށް ނިގޮމްބޯ މެޖިސްޓްރޭޓް ކޯޓުން ވަނީ އަމުރުކޮށްފައެވެ.
މި މައްސަލައިގައި ފުރަތަމަ ހައްޔަރުކޮށްފައިވަނީ އުމުރުން 40 އަހަރުގެ ހަސަން އަބްދުﷲ، ނ. ލަންދޫ، ނިރު، އެވެ. އޭނާ ހައްޔަރުކޮށްފައިވަނީ މިދިޔަ ބުދަ ދުވަހުގެ ރޭ ރާއްޖެއިން ލަންކާއަށް ދިޔަ މަގުމަތީގައި، ބަންޑާރަނައިކެ އިންޓަނޭޝަނަލް އެއާޕޯޓުންނެވެ. ލަންކާގެ ފުލުހުންނަށް ލިބުނު އިންޓެލިޖެންސް މައުލޫމާތަކާ ގުޅިގެން ހިންގި އެ އޮޕަރޭޝަންގައި ހަސަން އަބްދުﷲ ހައްޔަރުކުރިއިރު، އޭނާ ހުރީ 602 ގްރާމްގެ އައިސް ހަށިގަނޑުގައި ބަނދެގެން ފޮރުވައިގެންނެވެ.
ފުލުހުންގެ ތަހުގީގުގައި ހަސަން އަބްދުﷲ ބުނެފައިވަނީ، އޭނާ އެ މަސްތުވާތަކެތި އެ ގައުމަށް އެތެރެކުރީ ލަންކާގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ މީހަކާ ހަވާލުކުރުމުގެ ބޭނުމުގައި ކަމަށެވެ. އެ މައުލޫމާތުގެ މައްޗަށް ބިނާކޮށް، ފުލުހުން ވަނީ ކޮލޮމްބޯގެ ހޮޓަލެއް ބަލައި ފާސްކޮށް، އުމުރުން 28 އަހަރުގެ މުހައްމަދު ޝާފީ ބިން އަހުމަދު، ހ. ޕަލްމެއިރާ ހައްޔަރުކޮށްފައެވެ.
ލަންކާގެ ފުލުހުން މުހައްމަދު ޝާފީ ހުރި ކޮޓަރި ބަލައި ފާސްކުރިއިރު، އެ ތަނުން ވެސް 607 ގްރާމްގެ އައިސް ފެނިފައިވެއެވެ. މި މައްސަލައާ ގުޅިގެން ހައްޔަރުކުރި ދެ ދިވެހިން ނިގޮމްބޯ މެޖިސްޓްރޭޓް ކޯޓަށް ހާޒިރުކުރުމުން، މައްސަލައިގެ ތަހުގީގު ކުރިއަށް ގެންދިއުމަށްޓަކައި 14 ދުވަހުގެ މުއްދަތަކަށް އެ މީހުން ބަންދުގައި ބޭތިއްބުމަށް ކޯޓުން ވަނީ ނިންމާފައެވެ.
ކިޔުންތެރިންގެ ހިޔާލު