ސަރުކާރު ސްކޫލްތަކަށް އަންނަ އަހަރު ކުދިން ވެއްދުމަށް ފުރުޞަތު ހުޅުވާލައިފިއެވެ.
ތަޢުލީމާ ބެހޭ ވުޒާރާއިން ބުނީ އަންނަ އަހަރަށް ސަރުކާރުގެ ސްކޫލްތަކަށް ކުދިން ވެއްދުމުގެ ފުރުޞަތު އަންނަ އޮގަސްޓު މަހުގެ ނިޔަލަށް ހުޅުވާލާފައިވާކަމަށެވެ. އެގޮތުން ފޯމު ހުށައެޅުމަށް މިހާރު އޮންލައިންކޮށް ހުޅުވާލާފައިވާކަމަށް އެ ވުޒާރާއިން ބުންޏެވެ. އެގޮތުން ފޯމު ހުށައެޅޭނީ www.moe.gov.mv މެދުވެރިކޮށްކަމަށްވެސް ވުޒާރާއިން ބުންޏެވެ.
މީގެ ކުރިން އާންމުކޮށް ސްކޫލަށް ކުދިން ވެއްދުމަށް ހުޅުވާލަނީ ބަންދު ދުވަސްވަރުއެވެ. ނަމަވެސް މިފަހަރު ދުރާލާ ފުރުޞަތު ހުޅުވާލުމުން ކުރިން ދިމާވާ ގޮންޖެހުންތަކަށް ހައްލު ލިބޭނެކަމަށް އެ ވުޒާރާއިން ބުންޏެވެ. 2024 ވަނަ އަހަރުން ފެށިގެން ދަރިވަރުން ސްކޫލަށް ވެއްދުމުގެ މަސައްކަތް ކުރިން ދުރާލާ ނިންމަމުންދާތީ ބޮޑެތި ލުއިތަކެއް ލިބޭކަމަށް އެ ވުޒާރާއިން ބުންޏެވެ.
ތަޢުލީމީ ވުޒާރާއިން ވަނީ ޚާއްސަ ޙާލަތެއް ނެތި ދަރިވަރުން އެއް ސްކޫލުން އަނެއް ސްކޫލަށް ބަދަލު ކުރުމަށް ވަކި މުއްދަތެއް ދިނުމަށްވެސް ނިންމާފައެވެ. ސްކޫލު ބަދަލު ކުރެވޭނެ މުއްދަތު އެ އަހަރެއްގެ އެކަޑަމިކް ކަލަންޑަރުގައިއެވެ.
މިއަހަރު ސަރުކާރުގެ 218އެއްހާ ސްކޫލުގައި 77000 އަށްވުރެ ގިނަ ދަރިވަރުން ތަޢުލީމު ހާސިލުކުރެއެވެ.
ކިޔުންތެރިންގެ ހިޔާލު