އޮންލައިންކޮށް ކިޔެވުމުގެ ފުރުސަތު އެއްކޮށް ހިފެހެއްޓުމަކީ ރަނގަޅު ގޮތެއް ނޫންކަމަށް ތަޢުލީމާއި، މަތީތަޢުލީމާއި މަސައްކަތްތެރިކަމާ ބެހޭ ވުޒާރާއިން ބުނެފިއެވެ.
ރައްޔިތުންގެ މަޖިލީހުގެ ޤަވާއިދު ކޮމިޓީގައި ވާހަކަދައްކަވަމުން ސްޓޭޓް މިނިސްޓަރ އަޙްމަދު ޝަފީޢު ވިދާޅުވީ، ތަޢުލީމީ ނިޒާމަކީ ޒަމާނަށް އަންނަ ބަދަލުތަކާއި އެކު ކުރިއަށްގެންދަންޖެހޭ ނިޒާމެއްކަމަށެވެ. އެ ނޫންގޮތަކަށް ތަޢުލީމީ ނިޒާމްގެ ކަންކަން ބައްޓަންކުރުމަކީ ރަނގަޅު ގޮތެއް ނޫންކަން ފާހަގަކުރައްވާ ޝަފީޢު ވިދާޅުވީ ވަކި ގޮތަކަށް އުނގެނުމުގެ ފުރުސަތު ހިފަހައްޓައިފިނަމަ، ވަރަށް ގިނަ ބަޔަކަށް އުނގެމުގެ ހައްގު ގެއްލޭނެކަމަށެވެ.
ޝަފީއު ވިދާޅުވީ އޮންލައިން ނިޒާމެއްގެ ތެރެއިން ޚިދުމަތްތައް ހޯދުމުގެ އާދަ ދިވެހިންގެ ކިބައިގައި އަށަގަންނަމުންދާއިރު ތަޢުލީމު އުނގެނުމުގައި ވެސް އޮންލައިންގެ ނިޒާމްގެ ބޭނުން ހިފެންވާނެކަމަށް ޤަބޫލުކުރައްވާކަމަށެވެ. އަދި ޒަމާނާއި އެއްވަރަށް ތަޢުލީމީ ނިޒާމް ކުރިނާރާކަމަށް ބުނެ ބައެއް ފަރާތްތަކުން މިހާރުވެސް އެ ނިޒާމަށް ފާޑުކިޔުންތައް އަމާޒުކުރާކަމަށް ޝަފީޢު ވިދާޅުވިއެވެ.
ރާއްޖެ ފަދަ ޤައުމެއްގައި އިންސްޓިޓިއުޝަންތަކާއި ދުރުގައި ވަރަށް އެކަހެރި ހިސާބުތަކުގައި ރައްޔިތުން ތިބޭއިރު ތަޢުލީމީ ނިޒާމްތައް ބައްޓަންކުރަންވާނީ އެ ފުރުސަތު ވީހާވެސް ބޮޑަށް ލިބޭގޮތަށް.
ސްޓޭޓް މިނިސްޓަރ ވިދާޅުވިއެވެ.
ރައްޔިތުންގެ މަޖިލީހުގެ ގަވާއިދު ކޮމިޓީއިން ދިވެހިރާއްޖޭގައި ހިންގާ އޮންލައިން މަތީ ތަޢުލީމުގެ ޕްރޮގްރާމްތަކުގެ ފެންވަރާމެދު ހުރި ކަންބޮޑުވުންތައް ފާހަގަކޮށް ހުށަހަޅާފައިވާ މައްސަލައިގެ މަޢުލޫމާތު ސާފުކުރުމަށް މިނިސްޓްރީ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް… pic.twitter.com/1jP6wyucRa
— People's Majlis (@mvpeoplesmajlis) August 12, 2026
އޮންލައިން ނުވަތަ ވަރޗުއަލް ނިޒާމްގެ ތެރެއިން ކަންކަން މޮނިޓަރކުރަން އެހެން ނިޒާމްތަކަށްވުރެ ފަސޭހަކަމަށް ޝަފީޢު ފާހަގަކުރެއްވިއެވެ. އެގޮތުން ދަރިވަރުންނަށް އުނގަންނައިދިނުމާއި، ދަރިވަރުންނާއި ހިންގާ މުޢާމަލާތުތައް ދެނެގަތުމުގައި އޮންލައިން ނިޒާމެއްގައި ކަންކަން ބެލެހެއްޓުން ފަސޭހަވާނެކަމަށް ޝަފީޢު ވިދާޅުވިއެވެ.
ސްޓޭޓް މިނިސްޓަރ ޝަފީޢު ވަނީ، ކޮންމެ ދާއިރާއަކުން ކިޔެވިޔަސް ދަސްވެނިންގެ ތެރޭގައި އެކިފެންވަރުގެ މީހުން ތިބޭނެކަން ފާހަގަކުރައްވާފައެވެ. އެހެންނަމަވެސް އެއިން ކޮންމެ މީހަކަށްވެސް ދަސްވެނިވުމަށް ފުރުސަތު ދެނީ އެ މީހަކު ކިޔަވާ ކޯހެއްގައި ފުރިހަމަކުރަންޖެހޭ ކަންކަން ފުރިހަމަކޮށް، އެ ކޯހެއް ނިންމާއިރު އެ މީހެއްގެ ކިބައިގައި ހުންނަންޖެހޭ ޤާބިލްކަން ފުރިހަމަވިކަން ކަށަވަރުކުރުމަށްފަހުކަމަށް ޝަފީޢު ވިދާޅުވިއެވެ.
ކިޔުންތެރިންގެ ހިޔާލު