ރާއްޖެއިން ބަންގްލަދޭޝްގެ ވެރިރަށް ޑާކާއަށް ދަތުރުކުރި ދެ މީހެއްގެ ހަށިގަނޑުތެރޭ ފޮރުވައިގެން ގެންދިޔަ ގިނަ އަދަދެއްގެ ރަން ބަންގްލަދޭޝްގެ ކަސްޓަމްސް އިންޓެލިޖެންސް އެންޑް އިންވެސްޓިގޭޝަން ޑައިރެކްޓްރޭޓް (ސީއައިއައިޑީ) އިން އަތުލައިގެންފިއެވެ.

ޑާކާގެ ހަޒްރަތު ޝާހްޖަލާލް އިންޓަނޭޝަނަލް އެއާޕޯޓުގެ އޮފިޝަލުން ވަނީ ދިވެހިރާއްޖެއިން އައި ދެ ފަސިންޖަރެއްގެ ފުރަގަސްފަރާތުގައި ފޮރުވައިގެން ގެނައި، ޖުމްލަ 2.734 ކިލޯގްރާމް ބަރުދަންހުރި، ރަން ޕޭސްޓް އެކުލެވޭ ބިހުގެ ބައްޓަމަށް ހުރި ހަ އެތި އަތުލައިގެންފައެވެ.

ޗަޓޮގްރާމާއި ޑާކާގެ އެއާޕޯޓުގައި އާދީއްތަ ދުވަހު ހިންގި ވަކި ދެ އޮޕަރޭޝަނެއްގައި، ގާތްގަނޑަކަށް 5 ކްރޯޑް ޓާކާގެ އަގުހުރި ރަން ބިސްކޯދާއި ޕޭސްޓްގެ ގޮތުގައި ހުރި ރަންތަކެއް ކަސްޓަމްސް އިންޓެލިޖެންސްގެ އޮފިޝަލުން އަތުލައިގެންފައި ވެއެވެ.

އިޝްތިހާރު އިޝްތިހާރު

ހޯމަ ދުވަހު ނެރުނު ނޫސްބަޔާނެއްގައި ބުނެފައިވާ ގޮތުގައި، ޗަޓޮގްރާމްގެ ޝާހް އަމާނަތު އިންޓަނޭޝަނަލް އެއާޕޯޓުން ފަސިންޖަރެއްގެ އަތުން ވަނީ، ތަވައެއްގެ ތެރޭގަޔާއި ތަރުކާރީ ގާނާ އެއްޗެއްގެ ތެރޭގައި ފޮރުވާފައި ހުރި 466 ގްރާމްގެ ރަން ބިސްކޯދާއި، ޑިކްލެއާކޮށްފައިވާ 100 ގްރާމްގެ ރަން ގަހަނާ އަތުލައިގެންފައެވެ.

ޗަޓޮގްރާމްގައި ހިންގި އޮޕަރޭޝަނުގައި، އަބޫދާބީން ޔޫއެސް-ބަންގްލާ އެއާލައިންސްގެ ފްލައިޓަކުން އައި ފަސިންޖަރެއް ކަމަށްވާ ކަމްރުލް އިސްލާމް، ޝާހް އަމާނަތު އިންޓަނޭޝަނަލް އެއާޕޯޓަށް ފައިބާފައިވަނީ އާދީއްތަ ދުވަހުގެ ހެނދުނު 7:00 ގައެވެ.

ލިބުނު މައުލޫމާތަކާ ގުޅިގެން، ކަސްޓަމްސް އިންޓެލިޖެންސްގެ އޮފިޝަލުން ތިބީ ގްރީން ޗެނަލްގައި ސަމާލުވެގެންނެވެ.

އެ ފަސިންޖަރު އަތުގައި 100 ގްރާމްގެ ރަން ގަހަނާ ހުރި ކަމަށް ޑިކްލެއާ ކުރި ނަމަވެސް، އިތުރު އެއްވެސް ރަނެއް ނެތް ކަމަށް އޭނާ ބުންޏެވެ.

އެހެން އިދާރާތަކުގެ އޮފިޝަލުންގެ ހާޒިރުގައި އޭނާގެ ލަގެޖް ފަހުން ބަލައިފާސްކުރުމުން، ތަވައެއްގެ ތެރޭގަޔާއި ތަރުކާރީ ގާނާ އެއްޗެއްގެ ތެރޭގައި ފޮރުވާފައި ހުރި، 466 ގްރާމް ބަރުދަން ހުރި ހަތަރު ރަން ބިސްކޯދު ވަނީ ފެނިފައެވެ.