ޑޮލަރުގެ އަގު ތިރި ނުވަނީސް އުމްރާނީ ހުރިހާ މަޝްރޫއެއް މެދުކަނޑައިލުމަށް ކުރީގެ ރައީސް އަދި އެމްޑީޕީގެ ޗެއާޕާސަން މުޙައްމަދު ނަޝީދު ގޮވާލައްވައިފިއެވެ.
ސޯޝަލް މީޑިއާ މަންސަ އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ، ސަރުކާރުން އަސާސީ ޚިދުމަތްތަކަށް ކުރާ ޚަރަދު ފިޔަވައި އިތުރު ޚަރަދުތައް ކުރުން މިވަގުތަށް ރަނގަޅު ނޫން ކަމަށެވެ. އަދި ރަށްރަށުގައި ނުނިމި ހުރި މަޝްރޫއުތައް ރަށު ކައުންސިލްތަކާ ހަވާލުކުރުން ބުއްދިވެރިކަމަށް އެމަނިކުފާނު ފާހަގަކުރެއްވިއެވެ. ނަޝީދު އިތުރަށް ވިދާޅުވީ ކައުންސިލްތަކުން ކްރޮސް ސަބްސިޑީގެ އުސޫލުން އަގުތައް ދައްކައިގެން އެ މަޝްރޫއުތައް ނިންމޭނެ ކަމަށެވެ. ކްރޮސް ސަބްސިޑީގެ އުސޫލުން މަޝްރޫއުތައް ހިންގުމަކީ ފައިދާ ލިބޭ ޚިދުމަތަކުން ނުވަތަ ކަމަކުން ގެއްލުން ލިބޭ ކަމަކަށް ޚަރަދުކޮށްގެން ކުދި އަގުގައި މަޝްރޫއުތައް ކުރިއަށް ގެންދިއުމެވެ.
މި މައްސަލައާ ގުޅިގެން އިދިކޮޅު އެމްޑީޕީން ކުރިއަށްގެންދިޔަ ޕެނަލް ޑިސްކަޝަންގައި ވާހަކަދައްކަވަމުން ކުރީގެ ފިނޭންސް މިނިސްޓަރު އިބްރާހީމް އަމީރު ވަނީ ސަރުކާރުގެ މާލީ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ. އަމީރު ވިދާޅުވީ ފާއިތުވި ދެ އަހަރާއި ބައިގެ ތެރޭގައި ބޭރުގެ އެއްވެސް ގައުމަކުން ޑޮލަރެއް މި ސަރުކާރަށް ހޯދިފައި ނުވާ ކަމަށެވެ. އަދި ރާއްޖޭގެ އެތެރޭގައި ހުރި ޑޮލަރުތައް ޚަރަދުކުރީ ސަރުކާރުގެ އިސްރާފުތަކާއި ބޭނުންނުވާ މަޝްރޫއުތައް ހިންގަން ކަމަށް އޭނާ ތުހުމަތުކުރެއްވިއެވެ.
އަމީރުގެ މި ތުހުމަތުތަކަށް ރައްދު ދެއްވައި އިކޮނޮމިކް މިނިސްޓަރު މުޙައްމަދު ސަޢީދު ވަނީ، ރާއްޖެ މިއަދު އޮތް އިގުތިޞާދީ ފުން ވަޅުގަނޑަށް ވައްޓައިލުމުގެ އަސްލު މޭސްތިރިޔަކީ އަމީރު ކަމަށް ވިދާޅުވެފައެވެ. އަދި އިގުތިޞާދީ ދަތިކަމުގެ ވާހަކަ ދެއްކެވުމުގެ އެއްވެސް ހައިސިއްޔަތެއް އަމީރުގެ ކިބައިގައި ނެތް ކަމަށް ވެސް ނޫސްވެރިންގެ ބައްދަލުވުމެއްގައި ސަޢީދު ވަނީ ވިދާޅުވެފައެވެ.
ކިޔުންތެރިންގެ ހިޔާލު