ބޭންކް އޮފް މޯލްޑިވްސްގެ ސަރވަރ މެއިންޓަނަންސް މަސައްކަތަކާ ގުޅިގެން، އާރްޓީއެލްގެ ޚިދުމަތް ހޯދާފައިވާ ފަރާތްތަކަށް ކުރިން ކޮށްފައިވާ ދަތުރުތަކުގެ ޕޭމަންޓް ނޮޓިފިކޭޝަންތަކެއް ލިބުމަކީ އެކަށީގެންވާ ކަމެއް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
އެމްޓީސީސީން ބަޔާންކޮށްފައިވާ ގޮތުގައި މިފަދަ ކަމެއް މެދުވެރިވާން ދިމާވީ އާރްޓީއެލްގެ ޕޭމަންޓް ކަލެކްޝަންއަށް ބޭނުންކުރާ ބީއެމްއެލްގެ ނިޒާމުތައް ބެލެހެއްޓުމަށް ކުރިއަށްގެންދިޔަ ފަންނީ މަސައްކަތްތަކެއްގެ ސަބަބުންނެވެ. މި މަސައްކަތުގެ ތެރެއިން، އާންމު ދަތުރުފަތުރުގެ ޚިދުމަތް ހޯދާފައިވާ ފަރާތްތަކުން ކުރިން ކޮށްފައިވާ މުއާމަލާތްތަކާ ގުޅޭ މެސެޖުތައް ކަސްޓަމަރުންނަށް އަލުން ފޮނުވިދާނެ ކަމަށް ބޭންކުން ވަނީ އެ ކުންފުންޏަށް އަންގާފައެވެ.
މިކަމާ ގުޅިގެން އާންމުން ސަމާލުވުމަށް އިލްތިމާސްކުރަމުން، މި މެއިންޓަނަންސް މަސައްކަތުގެ ސަބަބުން ކަސްޓަމަރުންނަށް ދިމާވެދާނެ އެންމެހައި ދަތިތަކަށް އެމްޓީސީސީން ވަނީ މައާފަށް އެދިފައެވެ. އަދި ކަސްޓަމަރުންގެ ފަރާތުން އަބަދުވެސް ލިބެމުންދާ ފުރިހަމަ އެއްބާރުލުމަށް އެ ކުންފުނިން ވަނީ ޝުކުރު އަދާކޮށްފައެވެ. މީގެ އިތުރުން، މި މައްސަލައާ ގުޅޭގޮތުން ނުވަތަ ދަތުރުފަތުރުގެ ޚިދުމަތާ ގުޅޭގޮތުން އިތުރު މައުލޫމާތު ސާފުކުރުމަށް ބޭނުންވާ ފަރާތްތަކުން އެ ކުންފުނީގެ ހޮޓްލައިން ނަންބަރު 1650 އަށް ގުޅުމަށް ވެސް އެމްޓީސީސީން ވަނީ އެދިފައެވެ.
ކިޔުންތެރިންގެ ހިޔާލު