ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އައްޑޫ އަތޮޅުގެ ފަތުރުވެރިކަން ފުޅާކޮށް ކުރިއެރުވުމަށްޓަކައި “އައްޑޫ ހަންކެޑެ ޑިވެލޮޕްމަންޓް ކޯޕަރޭޝަން ލިމިޓެޑް” ގެ ނަމުގައި ސަރުކާރުގެ ކުންފުންޏެއް އުފައްދަވައިފިއެވެ.
ރައީސުލްޖުމްހޫރިއްޔާ މި ކުންފުނި އުފައްދަވާފައިވަނީ ދިވެހިރާއްޖޭގެ ކުންފުނީގެ ޤާނޫނުގެ ފަނަރަ ވަނަ މާއްދާގެ ދަށުންނެވެ. އައްޑޫ ހަންކެޑެ ޑިވެލޮޕްމަންޓް ކޯޕަރޭޝަން ލިމިޓެޑް އުފެއްދެވިކަން ރަސްމީކޮށް އިޢުލާންކުރައްވާފައިވަނީ ދިވެހިސަރުކާރުގެ ގެޒެޓުގައި ޝާއިޢުކުރެއްވި ރިޔާސީ ޤަރާރު ނަންބަރު ބާރަ އޮބްލިކް ދެހާސްސައްބީސް އިންނެވެ. މިއީ ސީދާ ދިވެހި ސަރުކާރުގެ ސައްތައިންސައްތަ ހިއްސާ އެކުލެވޭ ގޮތަށް އުފެއްދެވި ކުންފުންޏެކެވެ.
މި އައު ކުންފުނި އުފެއްދެވުމުގެ އެންމެ މުހިންމު ބޭނުމަކީ، އިންޓެގްރޭޓެޑް ޓޫރިޒަމް ޑިވެލޮޕްމަންޓް މޮޑެލަކަށް އައްޑުއަތޮޅު ހަންކެޑެ ތަރައްޤީކުރުމެވެ. މި މަސައްކަތުގެ ތެރެއިން އައްޑޫ އަތޮޅުގައި ފަތުރުވެރިކަމުގެ ސިނާޢަތް ވަރަށް ބޮޑަށް ފުޅާވެ، އެ ދާއިރާގައި ހަރަކާތްތެރިވުމުގެ ފުރުޞަތު އަތޮޅުގެ ރައްޔިތުންނަށް އިތުރުވެގެންދާނެއެވެ. އަދި އައްޑޫ އަތޮޅުގެ ފަތުރުވެރިކަން ކުރިއެރުވުމަށް ސަރުކާރުން ރާވާފައިވާ ކަންކަން ހަރުދަނާ ނިޒާމެއްގެ ތެރެއިން ތަންފީޒުކުރުމަކީވެސް ކުންފުނީގެ މުހިންމު އަމާޒެކެވެ.
ހަންކެޑެ މަޝްރޫޢުގެ ދަށުން ސަރުކާރުން ކަނޑައަޅާފައިވާ އިޤްތިޞާދީ ލަނޑުދަނޑިތައް ހާސިލުކުރުމަށް ކުރަންޖެހޭ އެންމެހައި މަސައްކަތްތައް ރޭވުންތެރިކަމާއެކު މި ކުންފުނިން ކުރިއަށް ގެންދާނެއެވެ. މި މަޝްރޫޢުގެ އެންމެ ބޮޑު އެއް ފައިދާއަކީ ފަތުރުވެރިކަމުގެ ސިނާޢަތުން ލިބޭ މަންފާ މުޅި އައްޑޫ އަތޮޅަށް ހަމަހަމަކަމާއެކު ފޯރުކޮށްދިނުމަށް މަގުފަހިވުމެވެ. މީގެ ސަބަބުން އަތޮޅުގެ އިޤްތިޞާދީ ދުވެލި ހަލުވިވެ، ވަޒީފާގެ އައު ފުރުޞަތުތައް ތަނަވަސްވެގެންދާނެކަމަށް ބެލެވެއެވެ.
ކިޔުންތެރިންގެ ހިޔާލު