ވޯލްޑް ކަޕް ސެމީ ފައިނަލުގައި އިންގްލޭންޑުގެ މައްޗަށް 2-1 އިން ކުރި ހޯދައި އެންމެ ފަހުގެ ޗެމްޕިއަން އާޖެންޓީނާއިން ފައިނަލްގެ ޖާގަ ކަށަވަރުކޮށްފިއެވެ.
ވިދިވިދިގެން ދެވަނަ ފައިނަލަށް ދަތުރުކުރީ އިންގްލެންޑުން ފުރަތަމަ ލަނޑު ޖަހާ ކުރި ހޯދާފައި ވަނިކޮށް، މެޗުގެ އިތުރު ވަގުތުގެ ލަނޑުން މޮޅުވެގެންނެވެ. މެޗުގައި އިންގްލެންޑުން ލީޑް ނެގީ ދެވަނަ ހާފް ފަށައިގެން 10 ވަނަ މިނިޓްގައި، އެންތަނީ ގޯޑަންގެ ލަނޑުންނެވެ. މޯގަން ރޮޖާސް ނަގައިދިން ހުރަސް ގޯޑަން ގޯލަށް ފޮނުވާލީ އެއްފަހަރުން ޖަހައެވެ. އެލީޑްގައި މެޗުގެ 85 ވަނަ މިނިޓާ ހަމައަށް އިންގްލެންޑް ދެމިއޮތެވެ. އާޖެންޓީނާއިން ނަތީޖާ ހަމަހަމަ ކުރީ މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް، އެންޒޯ ފެނާންޑޭޒްގެ ލަނޑުންނެވެ. އިންގްލެންޑްގެ މައްޗަށް އާޖެންޓީނާ އިން ކުރި ހޯދާ، ފައިނަލަށް ދަތުރުކުރީ މެޗުގެ އިތުރު ވަގުތުގެ ދެވަނަ މިނިޓްގައި ލައުޓާރޯ މާޓިނޭޒް ޖެހި ލަނޑުންނެވެ. އާޖެންޓީނާގެ ދެ ލަނޑު ޖަަހަންވެސް ފުރުޞަތު ތަނަވަސްކޮށްދިނީ ކެޕްޓަން މެސީއެވެ.
މިއާއެކު 60 އަހަރުގެ ތެރޭގައި މުބާރާތުގެ ފައިނަލަށް ދަތުރުކުރަން އިންގްލެންޑަށް ލިބުނު ފުރުޞަތު ގެއްލި، އާޖެންޓީނާއިން ތަށި ދިފާއުކުރުމުގެ ފުރުޞަތު ހޯދީއެވެ.
ފައިނަލްގައި އާޖެންޓީނާ ވާދަކުރާނީ ޔޫރަޕްގެ ޗެމްޕިއަން ސްޕެއިންއާއެވެ.
ކިޔުންތެރިންގެ ހިޔާލު