ކުޅުދުއްފުށީ ސިޓީއަށް ކަރަންޓުގެ ޚިދުމަތް ފޯރުކޮށްދިނުމަށްޓަކައި ފެނަކަ ކޯޕަރޭޝަނާއި ކުޅުދުއްފުށީ ސިޓީ ކައުންސިލާ ދެމެދު އެއްބަސްވުމެއް އެކުލަވާލަން ނުޖެހޭނެކަމަށް ސިވިލް ކޯޓުން ހުކުމްކޮށްފިއެވެ.
މިގޮތަށް ހުކުމްކޮށްފައިވަނީ، ލާމަރުކަޒީ ގާނޫނުގެ ދަށުން ކަރަންޓު ދިނުމަކީ ކައުންސިލްގެ ޒިންމާއެއްކަމަށް ބުނެ އެއްބަސްވުމެއް ހެދުމަށް ފެނަކައިގެ މައްޗަށް އަމުރުކޮށްދިނުމަށް އެދި ސިޓީ ކައުންސިލުން ހުށަހެޅި މައްސަލަ ބެލުމަށްފަހުގައެވެ. ކުޅުދުއްފުށީ ސިޓީ ކައުންސިލުން ސިވިލް ކޯޓަށް ހުށަހެޅި މައްސަލައިގައި ބުނެފައިވަނީ، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން އެ ސިޓީއަށް ކަރަންޓުގެ ޚިދުމަތް ފޯރުކޮށްދިނުމަކީ ކައުންސިލަށް ލާޒިމްކޮށްފައިވާ ކަމެއް ކަމަށެވެ. އެހެންކަމުން އެ ޚިދުމަތް ފެނަކަ މެދުވެރިކޮށް ދިނުމަށްޓަކައި ދެ ފަރާތުގެ ދެމެދުގައި އެއްބަސްވުމެއް ގާއިމުކުރަންޖެހޭނެ ކަމަށާއި، ނަމަވެސް އެކަމަށް ފެނަކައިން އެއްބާރުލުން ދީފައިނުވާކަމަށް ކައުންސިލުން ފާހަގަކޮށްފައިވެއެވެ.
މި ދައުވާއާ ގުޅިގެން ފެނަކައިން ކޯޓުގައި ބުނެފައިވަނީ، ކައުންސިލާއެކު އެއްބަސްވުމެއް ގާއިމުކުރަން އަމުރުކުރަންޖެހޭ ޝަރުއީ އަދި ގާނޫނީ ސަބަބެއް ނެތް ކަމަށެވެ. އަދި އެފަދަ އެއްބަސްވުމެއް ނެތުމަކީ ކައުންސިލްގެ ގާނޫނީ ޒިންމާ އަދާކުރުމަށް އެޅޭނެ ހުރަހެއް ނޫންކަމަށްވެސް އެ ކުންފުނިން ދިފާއުގައި ފާހަގަކޮށްފައިވެއެވެ.
މި މައްސަލަ ބެއްލެވި ފަނޑިޔާރުން ކުރެއްވި ހުކުމުގައި ބަޔާންކޮށްފައިވަނީ، ފެނަކައިން ރައްޔިތުންނަށް ޚިދުމަތް ދެމުން ގެންދަނީ ދިވެހި ސަރުކާރުން އެކަން އެ ކުންފުނީގެ މައްޗަށް ލާޒިމްކޮށްފައިވާތީ ކަމަށެވެ. އެހެންކަމުން މި މައްސަލައިގައި އިތުރު ގޮތެއް ކަނޑައަޅަންޖެހޭނެ ނުކުތާއެއް ނެތްކަމަށް ފާހަގަކުރައްވައި، ކުޅުދުއްފުށީ ސިޓީ ކައުންސިލުން ފެނަކައާ ދެކޮޅަށް ކުރި ދައުވާ ސާބިތުނުވާކަމަށް ސިވިލް ކޯޓުން ވަނީ ނިޔާ ކަނޑައަޅާފައެވެ.
ކިޔުންތެރިންގެ ހިޔާލު