އައްޑޫ ސިޓީ ކައުންސިލުން މާލިއްޔަތު ގަވާއިދާ ޚިލާފަށް ބޮޑެތި ގޯސްތަކެއް ހަދާފައިވާ ކަމަށް ބުނާ މައްސަލަ ޖިނާއީ ތަހުގީގެއް ހިންގުމަށްޓަކައި ފުލުހުންނަށް ހުށަހެޅުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ނިންމައިފިއެވެ.
މި ގޮތަށް ނިންމާފައިވަނީ އެ ކައުންސިލުގެ 2022 ވަނަ އަހަރުން ފެށިގެން 2024 ވަނަ އަހަރާ ހަމައަށް އާންމުކޮށްފައިވާ މާލީ އޮޑިޓް ރިޕޯޓުތައް ދިރާސާކުރުމަށް ފަހުގައެވެ. އޮޑިޓް ރިޕޯޓުގައިވާ ގޮތުން 2023 ވަނަ އަހަރާއި 2024 ވަނަ އަހަރު ކައުންސިލުން ކުރި ތަޖުރިބާ ދަތުރުތަކަށް 1.2 މިލިއަން ރުފިޔާ ޚަރަދުކޮށްފައިވެއެވެ. މީގެ ތެރޭގައި މެލޭޝިއާއާއި ސިންގަޕޫރަށް ކުރި ދަތުރަކަށް 515101 ރުފިޔާ އަދި އަންހެނުންގެ ކޮމިޓީން ކުރި ދަތުރަކަށް 685509 ރުފިޔާ ޚަރަދުކޮށްފައިވާކަން ވަނީ ފާހަގަކޮށްފައެވެ. މި ދަތުރުތައް ކޮށްފައިވަނީ ޚަރަދު ކުޑަކުރުމަށް މާލީ ވުޒާރާއިން އަންގާފައިވާ އެންގުންތަކާ ޚިލާފަށް ކަމަށް ރިޕޯޓުގައި ބުނެފައިވެއެވެ.
މީގެ އިތުރުން ފަތުރުވެރިކަމުގެ ބޭނުމަށް އައްޑޫގެ އެކި އަވަށްތަކުން ދޫކޮށްފައިވާ ބިންތަކަށް އިއުލާނުކުރުމަކާ ނުލައި އިތުރު ބިންތަކެއް ދީފައިވާ މައްސަލައާއި ދައުލަތުގެ އާމްދަނީގެ ގޮތުގައި ބަލައިގެންފައިވާ 492533 ރުފިޔާ ޕަބްލިކް އެކައުންޓަށް ޖަމާކޮށްފައިނުވާ މައްސަލަ ވެސް ވަނީ ފާހަގަކޮށްފައެވެ. އަދި ހިތަދޫ އަވަށު އޮފީހަށް ގަތް ޕިކަޕަކާ އިންސްޕެކްޓުކުރުމެއް ނެތި ހަވާލުވެފައިވާއިރު އެ އުޅަނދުގައި ގިނަ މައްސަލަތަކެއް ހުރިކަން ވެސް އޮޑިޓުން ވަނީ ހާމަވެފައެވެ.
މި ކަންކަމާ ގުޅިގެން އައްޑޫ ސިޓީގެ މޭޔަރު ވިދާޅުވެފައިވަނީ އޮޑިޓް ރިޕޯޓުގައި ފާހަގަކޮށްފައިވާ ގިނަ ކަންކަމަކީ ގާނޫނާ ޚިލާފަށް ނުވަތަ ނާޖާއިޒު ފައިދާއެއް ހޯދުމުގެ ނިޔަތުގައި ކޮށްފައިވާ ކަންތައްތަކެއް ކަމަށް ގަބޫލުފުޅުނުކުރައްވާ ކަމަށެވެ. އަދި ތަޖުރިބާ ދަތުރުތަކާއި ބިން ދޫކުރުމުގެ ކަންކަން ކުރިއަށް ގެންގޮސްފައިވަނީ ކައުންސިލުން ފާސްކޮށްގެން ކަމަށް ވެސް އޭނާ ވަނީ ވިދާޅުވެފައެވެ.
ކިޔުންތެރިންގެ ހިޔާލު