މަތީ ސާނަވީ ތައުލީމު ހާސިލުކުރާ ދަރިވަރުންގެ ނިސްބަތް 48 އިންސައްތައަށް އިތުރުވެއްޖެކަމަށް އެޑިއުކޭޝަން، ހަޔާ އެޑިއުކޭޝަން އެންޑް ސްކިލްސް ޑިވެލޮޕްމެންޓް މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.
ހުޅުމާލޭގައި ހުންނަ ސީއެޗްއެސްސީގެ އާ އިމާރާތުގައި ބޭއްވި މަތީ އަރުތަވެރިންގެ އިނާމު 2025 ދިނުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، 2023 ވަނަ އަހަރު ސަރުކާރުން ވެރިކަމާ ހަވާލުވިއިރު ގްރޭޑް 10 ނިންމާ ކުދިންގެ ތެރެއިން މަތީ ސާނަވީއަށް ވަންނަނީ އެންމެ 34 އިންސައްތަ ކުދިން ކަމަށެވެ. ނަމަވެސް، ސިޔާސަތަށް ގެނައި ބަދަލުތަކާއި ހުޅުވާލި ފުރުސަތުތަކާއެކު މިހާރު ﷲގެ ވާގިފުޅާއެކު އެ އަދަދު 48 އިންސައްތައަށް އިތުރުކުރެވިފައިވާކަމަށް އެމަނިކުފާނު ފާހަގަކުރެއްވިއެވެ. މިއީ ވަރަށް ބޮޑު ކާމިޔާބީއެއްކަމަށާއި، މީގެ ސަބަބުން ގިނަގުނަ ފައިދާތަކެއް ކުރާނެކަމަށް މިނިސްޓަރު ވިދާޅުވިއެވެ.
މާލޭ ވޮކޭޝަނަލް ހައި ސްކޫލާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވީ، އެ ސްކޫލަކީ މިދިޔަ އަހަރު އުފައްދައި މިހާރުވެސް ކިޔަވައިދެމުންދާ މަރުކަޒެއް ކަމަށެވެ. ދަރިވަރުންނަށް އެންމެ އެކަށީގެންވާ މާހައުލެއް ހޯދައިދިނުމުގެ ގޮތުން، އަންނަ އޮގަސްޓް މަހުގެ ތެރޭގައި އެ ސްކޫލުގެ އާ އިމާރާތުގެ މަސައްކަތް ބަޔަކާ ހަވާލުކުރުމަށް މިނިސްޓްރީން މިހާރު މަސައްކަތް ކުރަމުންދާކަމަށްވެސް އެމަނިކުފާނު ހާމަކުރެއްވިއެވެ.
މިނިސްޓްރީ އޮފް އެޑިއުކޭޝަންގެ ދަށުން ހުނަރު ތަރައްގީކުރުމުގެ ބައި ހަރުދަނާކޮށް، ސިނާއަތްތަކާ ގުޅިގެން ވޯކް ބޭސް އެޕްރެންޓިސްޝިޕް ފުރުސަތުތައް ފުޅާކުރުމަކީ ސަރުކާރުގެ ވަރަށް މުހިންމު އަމާޒެކެވެ. މި މަސައްކަތްތަކުގެ މައިގަނޑު ބޭނުމަކީ ރާއްޖޭގެ ޒުވާނުންނަކީ އުފެއްދުންތެރި އަދި ބާރުވެރި ބަޔަކަށް ހަދައި، ގައުމުގެ އިންސާނީ ވަސީލަތް އިތުރަށް ކުރިއެރުވުންކަމަށް ޑރ. އިސްމާއީލް ޝަފީއު ވިދާޅުވިއެވެ.
ކިޔުންތެރިންގެ ހިޔާލު