މަތީ އަރުތަވެރިންގެ އިނާމު ދިނުމުގެ ޖަލްސާގައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު، ސްކޫލު ދަރިވަރުން ކިޔެވުމަށް އަމިއްލައަށް ޒިންމާވެ ރާއްޖޭގައި މިހާރު އޮތް ޓިއުޝަންގެ ސަގާފަތާ ދުރުވުމަށް ގޮވާލައްވައިފިއެވެ. މިނިސްޓަރު ވަނީ ދަރިވަރުންގެ ނަތީޖާ ރަނގަޅުކުރުމަށާއި ނަފުސާނީ ދުޅަހެޔޮކަމަށްޓަކައި އަމިއްލައަށް ކިޔެވުމަށް ވަގުތު ދިނުމުގެ މުހިންމުކަން ފާހަގަކުރައްވާފައެވެ.
ގްރޭޑް އެކަކުން ފެށިގެން ގްރޭޑް ބާރައިގެ ދަރިވަރުންނާ ހަމައަށް ކޮންމެ ކުއްޖަކު ވެސް ކިޔެވުމަށް އަމިއްލައަށް އިސްނަގައިގެން މަސައްކަތްކުރުމަކީ މުހިންމު ކަމެއްކަމަށް މިނިސްޓަރު ވިދާޅުވިއެވެ. ކިޔެވުމަށް ޝައުގުވެރިކަން އިތުރުކޮށް އަމިއްލައަށް ޒިންމާ ނަގާނަމަ، ކުދިންގެ ވިސްނުމާއި ފިލާވަޅު އުނގެނުމަށް ބޭނުންވާ އުކުޅުތައް ތަރައްގީވާނެކަން ފާހަގަކުރެއްވިއެވެ. އަދި ކަންކަން ބަލައި ހޯދައި، ކަންކަމާމެދު ފިކުރުކުރާ ދަރިވަރުން ކިޔެވުމުގައި ގިނަ ދުވަހު ދެމިތިބޭކަން ދިރާސާތަކުން ދައްކާކަމަށް ވެސް އެމަނިކުފާނު ވިދާޅުވިއެވެ.
ރާއްޖޭގައި މިހާރު އޮތް ޓިއުޝަންގެ ސަގާފަތަށް އަލިއަޅުއްވާލައްވަމުން، ދަރިވަރުން ސްކޫލުގައި ހަ ގަޑިއިރު ހޭދަކުރުމަށްފަހު، ގޭގައި އިތުރު ހަތަރު ގަޑިއިރާއި ހަ ގަޑިއިރާ ދެމެދުގެ ވަގުތެއް ޓިއުޝަނުގައި ހޭދަކުރާކަން މިނިސްޓަރު ފާހަގަކުރެއްވިއެވެ. ދަރިވަރުންނަށް ސްކޫލުން ބޭރުން އެހީތެރިކަން ބޭނުންވި ނަމަވެސް، އެ އެހީތެރިކަން ފޯރުކޮށްދޭންވާނީ ސްކޫލުގެ ކްލާސްރޫމުގައި ކިޔަވައިދޭ ފިލާވަޅުތަކަށް ދަރިވަރުން ދޭ ސަމާލުކަން ކުޑަނުވާނެ ފަދަ ގޮތަކަށްކަމަށް ވިދާޅުވިއެވެ. އަދި ސްކޫލުގެ ކްލާހުގައި ކިޔަވައިދޭ ފިލާވަޅުތަކަށް ބޮޑަށް ސަމާލުކަން ދިނުމުގެ މުހިންމުކަން ދަރިވަރުންނަށް ވިސްނައިދޭންޖެހޭކަމަށް ވެސް ވިދާޅުވިއެވެ.
ގޭތެރޭގައި ހޭދަކުރަން ލިބޭ ގިނަ ވަގުތު ޓިއުޝަނަށް ހުސްކުރަން ޖެހުމަކީ ދަރިވަރުންނަށް އޭގެ ނޭދެވޭ އަސަރުކުރާނެ ކަމެއްކަން ބަޔާންކުރައްވަމުން، ދަރިވަރުންގެ ނަފުސާނީ ދުޅަހެޔޮކަމަށްޓަކައި ކުޅިވަރުގައި ޝާމިލުވުމަށާއި ހުސްވަގުތުގައި ހިތްހަމަޖެހޭ ކަންކަން ކުރުމަށް ފުރުސަތު ދިނުމަށް މިނިސްޓަރު އިލްތިމާސްކުރެއްވިއެވެ. މީގެ އިތުރުން، އަމިއްލައަށް ވަގުތު މެނޭޖުކުރުމުގެ ގާބިލުކަން ދަރިވަރުންގެ ކިބައިގައި އަށަގަންނުވަން ޖެހޭކަމަށް ވެސް ވިދާޅުވިއެވެ. އަމިއްލައަށް ދިރާސާކޮށްގެން ދަސްކުރާ ފިލާވަޅުތައް ދަރިވަރުންގެ ހިތުގައި ހަރުލާ މިންވަރު ބޮޑުކަމަށް ދިރާސާތަކުން ދައްކާތީ، މިކަމާމެދު މުޖުތަމައުގެ ހޭލުންތެރިކަން އިތުރުކޮށް ފިޔަވަޅުތައް އެޅުމަށް މިނިސްޓަރު ވަނީ ގޮވާލައްވާފައެވެ
ކިޔުންތެރިންގެ ހިޔާލު