އާޓިފިޝަލް އިންޓެލިޖެންސް ބޭނުންކޮށްގެން އެޑިޓްކޮށްފައިވާ ފޮޓޯ ޕާސްޕޯޓަށް ހުށަނޭޅުމަށް މޯލްޑިވްސް އިމިގްރޭޝަނުން އިލްތިމާސްކޮށްފިއެވެ.
މޯލްޑިވްސް އިމިގްރޭޝަނުން ބުނެފައިވާ ގޮތުގައި ޕާސްޕޯޓަކީ މީހާގެ ކާކުކަން ކަށަވަރުކޮށްދޭ އެންމެ މުހިންމު އެއް ސެކިއުރިޓީ ލިޔުމެވެ. އެހެންކަމުން، އާޓިފިޝަލް އިންޓެލިޖެންސް (އޭއައި) ފަދަ އާލާތްތައް ބޭނުންކޮށްގެން އެޑިޓްކޮށްފައި ހުންނަ ފޮޓޯތަކަކީ ޕާސްޕޯޓުގެ ފޮޓޯ މިންގަނޑާ ކަނޑައެޅިގެން ޚިލާފު އެއްޗެއްކަމަށް އެ އިދާރާއިން ވަނީ ކަނޑައަޅާފައެވެ. އަދި މިފަދަ ފޮޓޯތައް ބޭނުންކުރުމަކީ ސަލާމަތީ ގޮތުން ބޮޑެތި މައްސަލަތަކެއް ކުރިމަތިވެދާނެ ކަމެއްކަމަށް ވެސް ފާހަގަކޮށްފައިވެއެވެ.
ފަހަކަށް އައިސް މީސްމީޑިއާއާއި އެހެނިހެން ބޭނުންތަކަށް ފޮޓޯތައް ރީތިކުރުމަށާއި ބަދަލުތައް ގެނައުމަށް އޭއައި ޓެކްނޮލޮޖީ ބޭނުންކުރާ މިންވަރު ވަނީ ވަރަށް ބޮޑަށް އިތުރުވެފައެވެ. މީގެ ނަތީޖާއެއްގެ ގޮތުން، ޕާސްޕޯޓު ފަދަ ރަސްމީ ލިޔެކިޔުންތަކަށް ހުށަހަޅާ ފޮޓޯތަކުގައި ވެސް މިފަދަ ޓެކްނޮލޮޖީ ބޭނުންކުރުން އާންމުވަމުންދާތީ، އެކަމަށް ސަމާލުވުމަށް އިމިގްރޭޝަނުން ވަނީ އާންމުންނަށް ގޮވާލާފައެވެ.
ޕާސްޕޯޓަށް އެދި ހުށަހަޅާއިރު، އެ މީހެއްގެ އަސްލު ސިފަ ސާފުކޮށް ފެންނަން ހުންނަ، އިމިގްރޭޝަނުގެ މިންގަނޑުތަކަށް ފެތޭ ފޮޓޯ ހުށަހެޅުމަކީ ޕާސްޕޯޓު ދޫކުރުމުގެ މަރުހަލާ އަވަސްކުރުމަށް ލިބޭނެ ވަރަށް ބޮޑު އެހީތެރިކަމެކެވެ. މިންގަނޑާ ޚިލާފު ފޮޓޯ ހުށަހަޅާނަމަ، އެ ފޯމެއް ބާތިލުވެ ޕާސްޕޯޓު ލިބުން ލަސްވުމަކީ އެކަށީގެންވާ ކަމެކެވެ. އެހެންކަމުން، ހުރިހާ ފަރާތްތަކުން ވެސް މިކަމަށް ޚާއްޞަ ސަމާލުކަމެއް ދިނުމަށް އެ އިދާރާއިން ނަސޭހަތްތެރިވެއެވެ.
ކިޔުންތެރިންގެ ހިޔާލު