ދިވެހި “އޯޑިނަރީ އިލެކްޓްރޯނިކް ޕާސްޕޯޓު” ޕްރިންޓްކުރުމަށް ބޭނުންވާ ބުކްލެޓްތައް ރާއްޖެ ގެނައުމުގައި ދިމާވި ލަސްތަކާ ގުޅިގެން ޕާސްޕޯޓު ދޫކުރުމަށް ކުރިމަތިވި ދަތިތަކަށް އަންނަ ހަފުތާގެ ތެރޭގައި ދާއިމީ ހައްލެއް ލިބޭނެ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
“އެމްއެމްޓީވީ” އަށް މައުލޫމާތު ދެމުން އިމިގްރޭޝަނުން ބުނީ އައު ސްޓޮކް ލިބި ޕާސްޕޯޓު ދޫކުރުމުގެ ހިދުމަތްތައް އަންނަ ހަފުތާގައި އާންމު ހާލަތަށް ރުޖޫއަވާނެ ކަމަށެވެ. އަދި މި ވަގުތު އީ-ޕާސްޕޯޓު ދޫކުރުމުގައި އިސްކަންދެމުންދަނީ ކޮންމެހެން ފުރަންޖެހޭ ކުއްލި ހާލަތްތަކުގައިވާ މީހުންނަށް އެކަނި ކަމަށް ވެސް އެ އިދާރާއިން ބަޔާންކުރެއެވެ.
އީ-ޕާސްޕޯޓް ބުކްލެޓްގެ ސްޓޮކް ލިބުމުގައި ލަސްތަކެއް އުޅޭތީ، މި ދަނޑިވަޅުގައި އާންމުކޮށް ދޫކުރަމުން ދަނީ “ނޮން-އިލެކްޓްރޯނިކް ޕާސްޕޯޓް” އެވެ. މި ޕާސްޕޯޓަކީވެސް އިންޓަރނޭޝަނަލް ސިވިލް އޭވިއޭޝަން އޮގަނައިޒޭޝަން (އައިކާއޯ) ގެ މިންގަނޑުތަކަށް ފެތޭ، 5 އަހަރު ދުވަހުގެ މުއްދަތަށް ދޫކުރެވޭ މެޝިން ރީޑަބަލް ޕާސްޕޯޓެކެވެ. އޯޑިނަރީ އިލެކްޓްރޯނިކް ޕާސްޕޯޓަކަށް 1,000 ރުފިޔާގެ ފީއެއް ނަގާއިރު، ނޮން-އިލެކްޓްރޯނިކް ޕާސްޕޯޓުގެ ފީއަކީ 600 ރުފިޔާއެވެ.
މީގެއިތުރުން، މި ހާލަތާ ގުޅިގެން ރައްޔިތުންނަށް ލުއިފަސޭހަ ކޮށްދިނުމުގެ ގޮތުން، މިހާރު ނޮން-އިލެކްޓްރޯނިކް ޕާސްޕޯޓް ހައްދަވާ ފަރާތްތަކުގެ ޕާސްޕޯޓުގެ މުއްދަތު ހަމަވުމުގެ ކުރިން އީ-ޕާސްޕޯޓަކަށް ބަދަލުކުރަން އެދޭނަމަ، “ކެންސަލޭޝަން ފީ” އަކާ ނުލައި އެކަން ހަމަޖައްސައިދިނުމަށް އިމިގްރޭޝަނުން ވަނީ ނިންމާފައެވެ.
އަދި އިންޑިއާ އާއި ސްރީލަންކާއަށް ކުރު މުއްދަތަކަށް ދަތުރުކުރާ ފަރާތްތަކަށް، އެއް އަހަރު ދުވަހުގެ މުއްދަތު އޮންނަ އިމަޖެންސީ ޕާސްޕޯޓް ވެސް މިހާރު ދޫކުރަމުން އަންނަ ކަމަށް އެ އިދާރާއިން ފާހަގަކުރެއެވެ.
ކިޔުންތެރިންގެ ހިޔާލު