މާލޭގެ ގަލޮޅު ލޮނުޒިޔާރަތް މަގުގައި ހުރި ގ. ފުންފަޅު ގޭގައި މިރޭ އަލިފާނުގެ ހާދިސާއެއް ހިނގައި، އެ އިމާރާތުގެ ބައެއް ފަންގިފިލާތަކަށް ގެއްލުންތަކެއް ލިބިއްޖެއެވެ.
އެމްއެންޑީއެފުން ބުނިގޮތުގައި، މި ހާދިސާގެ ރިޕޯޓު ލިބިފައިވަނީ މިރޭ 10:49 ހާއިރުއެވެ. ރިޕޯޓު ލިބުމާއެކު އެމްއެންޑީއެފް ފަޔާ އެންޑް ރެސްކިއު ސާވިސްގެ ޓީމުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައެވެ. އަދި ގިނައިރުތަކެއް ނުވެ، އެ އިމާރާތުގައި ރޯވެފައިވާ އަލިފާންގަނޑު ވަނީ ކޮންޓްރޯލްކޮށްފައެވެ. މި ހާދިސާގައި އެއްވެސް މީހަކަށް އަނިޔާއެއް ލިބުނު ކަމުގެ މައުލޫމާތު މިހާތަނަށް ލިބިފައެއް ނުވެއެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ފުންފަޅު ގޭގެ ހަތަރުވަނަ ފަންގިފިލާގައި ވަރަށް ބޮޑަށް ވަނީ ރޯވެފައެވެ. އެ ފަންގިފިލާގެ ބެލްކަނީގައި އަލިފާން ރޯވެ، ގޭތެރޭގައި ހިފާ ގެންގުޅޭ ގިނަ ތަކެއްޗަށް ބޮޑެތި ގެއްލުންތަކެއް ލިބިފައިވާ މަންޒަރު ވީޑިއޯތަކުން ފެނެއެވެ. މީގެ އިތުރުން، އެ އިމާރާތުގެ ފަސްވަނަ ފަންގިފިލާއަށްވެސް އަލިފާނުގެ އަސަރުކޮށް، ކޮންމެވެސް ވަރެއްގެ ގެއްލުންތަކެއް ލިބިފައިވާކަން ވަނީ ފާހަގަކުރެވިފައެވެ.
މި އަލިފާނުގެ ހާދިސާ ހިނގަން މެދުވެރިވި ސަބަބު އަދި ކަށަވަރުކުރެވިފައެއް ނުވެއެވެ. ފުލުހުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.
ކިޔުންތެރިންގެ ހިޔާލު