ވެނެޒުއެލާއަށް ބުދަދުވަހު އައި ބާރުގަދަ ބިންހެލުންތަކުގައި މަރުވި މީހުންގެ އަދަދު 1،430 އަށް އަރައިފިއެވެ.
ވެސްޓިފައިވާ އެތައްސަތޭކަ އުސް އިމާރާތްތަކުގެ ދަށުން މީހުން ސަލާމަތް ކުރުމުގެ މަސައްކަތް ޓީމުތަކުން ކުރަމުން ގެންދާއިރު، މަރުވެފައިވާ އިތުރު މީހުންގެ ހަށިތައްވެސް ދަނީ ފެންނަމުންނެވެ. އަދި ދިރިތިބި އެތައް ބަޔަކުވެސް ސަލާމަތް ކުރަމުން އެބަ ގެންދެއެވެ.
ރެސްކިއު ޓީމުތަކުން މިހާތަނަށްވަނީ އިމާރާތްތަކުގެ ދަށުން ދިރިތިބި 243 މީހުން ސަލާމަތް ކޮށްފައެވެ.
ބިންހެލުންތަކުގައި ޒަޚަމްވި މީހުންގެ އަދަދުވެސް މިހާރު ވަނީ 4،000 އަށް އަރާފައެވެ.
ވެނެޒުއެލާގެ ކަމާބެހޭ އިދާރާތަކުން ބުނަނީ، ވެއްޓިފައިވާ އިމާރާތްތަކުގެ ދަށުވެ ގެއްލިފައިވާ މީހުންގެ އަދަދު 68،900 އަށް އަރާފައިވާ ކަމަށެވެ. މިއީ، އާއިލާތަކުން ވެނެޒުއެލާ ސަރުކާރަށް ރިޕޯޓް ކޮށްފައިވާ އަދަދުތައް ކަމަށް ބުނެއެވެ.
ވެނެޒުއެލާގެ ރެސްކިއު ޓީމުތަކާއި އަދި ދުނިޔޭގެ އެކި ގައުމުތަކުން ގޮސްފައިވާ ޓީމުތަކުންވެސް ގެންދަނީ މީހުން ސަލާމަތް ކުރުމުގެ މަސައްކަތް ކުރަމުންނެވެ.
އެގޮތުން، ލިބޭންހުރި މެޝިނަރީއާއި، އަތްފުނާ އަޅައިގެން މީހުން ހޯދުމުގެ މަސައްކަތް ކުރަމުން ގެންދާއިރު، ދިރިތިބި މީހުން ދެނެގަތުމަށް ކުއްތާވެސް ގެންދަނީ ބޭނުން ކުރަމުންނެވެ.
މިދިޔަ ބުދަ ދުވަހު ވެނެޒުއެލާއަށް ފުރަތަމަ އައީ ރިކްޓަރ މިންގަނޑުން 7.2 ގޭ ބާރުމިނުގެ ބިން ހެލުމެކެވެ. އޭގެ ސާޅީސް ސިކުންތުފަހުން 7.5 ގެ ބާރުމިނުގައި އައި ބިންހެލުމާއެކު، ވެރިރަށް ކަރާކަސްއާއި، އައްސޭރިފަށުގެ ލަ ގުއައިރާ ސިޓީގެ އިތުރުން، އެހެން ސިޓީތަކަށްވެސް ބޮޑެތި ގެއްލުންތައް ލިބިފައި ވެއެވެ.
އެންމެ ބޮޑަށް ގެއްލުންތައް ލިބިފައިވަނީ ލަ ގުއައިރާ ސިޓީއަށެވެ. އެ ސިޓީގެ ގިނަ އިމާރާތްތައްވަނީ ބިމާހަމަވެފައެވެ.
އިމާރާތްތަކާއި ގެތައް ވެއްޓި ބިމާހަމަވުމުގެ ސަބަބުން 3،100 މީހުން ގެދޮރުނެތި މަގުމަތިވެފައި ވެއެވެ.
ކިޔުންތެރިންގެ ހިޔާލު