ބޭންކް އޮފް މޯލްޑިވްސް (ބީއެމްއެލް) ގެ އަހަރީ ޕްރޮގްރާމެއްގެ ދަށުން، ހިނގާބިނގާވެ އުޅުމުގައި ނުކުޅެދުންތެރިކަން ހުންނަ ފަރާތްތަކަށް އެހީތެރިވުމުގެ ގޮތުން 30 ފުރޮޅުލީ ގޮނޑި ހަދިޔާކޮށްފިއެވެ.
ބީއެމްއެލުން މިފަދަ އެހީތެރިކަން ފޯރުކޮށްދިނުމުގެ މަސައްކަތް ފެށީ 2017 ވަނަ އަހަރުގައެވެ. މިއީ މުޖުތަމައުގެ ފައިދާއަށް އެ ބޭންކުން ކުރަމުން އަންނަ މުހިންމު ހަރަކާތްތަކުގެ ތެރެއިން އެއް ހަރަކާތެވެ. މި ޕްރޮގްރާމްގެ ދަށުން މިހާތަނަށް ރާއްޖޭގެ 105 އަށްވުރެ ގިނަ ރަށެއްގައި ދިރިއުޅޭ ފަރާތްތަކަށް 360 އަށްވުރެ ގިނަ ފުރޮޅުލީ ގޮނޑި ވަނީ ހަދިޔާކޮށްފައެވެ.
ބީއެމްއެލުން މައުލޫމާތު ދޭ ގޮތުގައި، މި އަހަރު އެ ބޭންކުން ވަނީ މި ޕްރޮގްރާމް އިތުރަށް ފުޅާކޮށްފައެވެ. އެގޮތުން ކުރިން ފޯރުކޮށްދެމުން އައި މޮޓޮރައިޒްޑް ފުރޮޅުލީ ގޮނޑިތަކުގެ އިތުރުން، މި އަހަރު އަލަށް ޚާއްސަ މެނުއަލް ފުރޮޅުލީ ގޮނޑިތަކެއް ވެސް ވަނީ ތައާރަފްކޮށްފައެވެ. މި ފަހަރު ތައާރަފްކުރި ގޮނޑިތަކަކީ އަމިއްލައަށް ގޮނޑި ދުއްވުމުގައި ދަތިތައް ހުންނަ އަދި އެހީތެރިންނާއި އާއިލާގެ އެހީތެރިކަމާއެކު އުޅޭ ކުޑަކުދިންނާއި ބޮޑެތި މީހުންނަށް ޚާއްސަ ކޮށްގެން ފަރުމާކޮށްފައިވާ ގޮނޑިތަކެކެވެ.
މި ހަރަކާތަކީ އިޖުތިމާޢީ ޒިންމާގެ ދަށުން މުޖުތަމައުގެ ދުޅަހެޔޮކަމަށް އިންވެސްޓްކުރުމަށް ބީއެމްއެލްއިން ކުރަމުންދާ މަސައްކަތުގެ ބައެކެވެ. ބޭންކުން ބުނާ ގޮތުގައި، މި އެހީތެރިކަމުގެ ސަބަބުން ނުކުޅެދުންތެރިކަން ހުންނަ ފަރާތްތަކުގެ ދިރިއުޅުމުގެ ފެންވަރު ރަނގަޅުވެ، މިނިވަންކަމާއެކު ދިރިއުޅުމުގެ ފުރުސަތުތައް ފަހިވެގެންދާނެއެވެ.
ކިޔުންތެރިންގެ ހިޔާލު