ފެނަކަ ކޯޕަރޭޝަންގެ މުވައްޒަފުންގެ އަދަދު އެކަށީގެންވާ މިންގަނޑަކަށް ފެއްތުމަށް ކުރަމުންދާ މަސައްކަތްތައް ނިމުމުން، ކުންފުނީގެ ޚަރަދުން ގާތްގަނޑަކަށް 22 މިލިއަން ރުފިޔާ ސަލާމަތްކުރެވޭނެ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހުސައިން ވިދާޅުވެއްޖެއެވެ.
ފެނަކަ ކުންފުނި ދެމެހެއްޓެނިވި ގޮތެއްގައި ވިޔަފާރީގެ އުސޫލުން ހިންގުމަށްޓަކައި، ކުންފުނީގެ ޚަރަދުތައް ކުޑަކުރުމަކީ މުހިންމު ކަމެއް ކަމަށް މެނޭޖިން ޑިރެކްޓަރު ފާހަގަކުރެއްވި އެވެ. މި މަސައްކަތުގެ މައިގަނޑު މަގުސަދަކީ ކުންފުނީގެ މާލީ ހާލަތު ރަނގަޅުކޮށް، ވަސީލަތްތައް އެންމެ ފައިދާހުރި ގޮތެއްގައި ބޭނުންކުރެވޭނެ މަގު ފަހިކުރުމެވެ. މި ބަދަލުތަކުގެ ސަބަބުން ކުންފުނީގެ ހިންގުމުގެ ޚަރަދު ކުޑަވެ، މާލީ ގޮތުން ބޮޑެތި ލުއިތަކެއް ލިބިގެންދާނެ ކަމަށް އޭނާ ވިދާޅުވިއެވެ.
ކުންފުނީގެ ހިންގުމާ ގުޅޭގޮތުން މައުލޫމާތު ދެއްވަމުން އަފީފް ވިދާޅުވީ، 8000 އެއްހާ މުވައްޒަފުން މިހާރު ފެނަކައިގައި މަސައްކަތް ކުރަމުންދާ ކަމަށާއި، މުސާރައަށް އެކަނި ވެސް މަހެއްގެ މައްޗަށް 90 މިލިއަން ރުފިޔާ ހޭދަކުރަން ޖެހޭ ކަމަށެވެ. ކުންފުނީގެ ބައެއް ގޮފިތަކުގައި މަސައްކަތަށް ބޭނުންވާ މިންވަރަށް ވުރެ ގިނައިން މުވައްޒަފުން ތިބުމަކީ ކުންފުނީގެ ހިންގުމަށް ބުރޫއަރައި، ދުވަހުން ދުވަހަށް ނިންމަން ޖެހޭ މަސައްކަތްތައް ލަސްވުމަށް މެދުވެރިވާ ސަބަބެއް ކަމަށް އޭނާ ފާހަގަކުރެއްވި އެވެ. ރަށްރަށުގެ ރައްޔިތުން ވެސް އެދެނީ ވީހާވެސް އަވަހަކަށް މި ކަންކަން ރަނގަޅުކޮށް، ފެނަކައިގެ ހިދުމަތްތައް ފެންވަރު ރަނގަޅު ކުރުމަށް ކަމަށް އޭނާ ވިދާޅުވިއެވެ.
މުވައްޒަފުންގެ އަދަދު މިންގަނޑުގެ ތެރެއަށް ފެއްތުމުގެ ގޮތުން، އަމިއްލައަށް އެދިގެން މާލީ އިނާޔަތްތަކާއެކު ވަޒީފާއިން ވަކިވުމުގެ ފުރުސަތު ކުންފުނިން ވަނީ ހުޅުވާލާފަ އެވެ. މި ފުރުސަތުގައި 97 މުވައްޒަފަކު ވަޒީފާއިން ވަކިވުމަށް މިހާތަނަށް ހުށަހަޅާފައިވެ އެވެ. މިހާރު ކުރިއަށްދަނީ އެ މުވައްޒަފުން ވަޒީފާއިން ވަކިވުމަށް ފުރިހަމަ ކުރަން ޖެހޭ އިދާރީ ކަންކަން ނިންމުމުގެ މަރުހަލާ ކަމަށް ފެނަކައިން މައުލޫމާތު ދެއެވެ.
ކިޔުންތެރިންގެ ހިޔާލު