ގދ. ފަރެސްމާތޮޑާއަށް ދިމާވެފައިވާ ކަރަންޓުގެ މައްސަލައަށް ދާއިމީ ހައްލެއް ހޯދައިދީ، ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމަށްޓަކައި ފެނަކަ ކޯޕަރޭޝަނުން އެރަށަށް ފޮނުވި 800 ކިލޯވޮޓުގެ އާ ޖެންސެޓް އެރަށަށް ފޮނުވައިފިއެވެ.
ފެނަކަ ކޯޕަރޭޝަނުން ބުނި ގޮތުގައި، ފަރެސްމާތޮޑާއަށް މި ޖެންސެޓް ފޮނުވީ އެރަށުގެ ކަރަންޓުގެ ބޭނުންތައް ދުވަހުން ދުވަހަށް އިތުރުވަމުންދާތީ، ޚިދުމަތް މެދުނުކެނޑި ދިނުމަށް ކުރަމުންދާ މަސައްކަތްތަކުގެ ދަށުންނެވެ. މި އާ ޖެންސެޓާއެކު އެރަށުގެ އިންޖީނުގެއަށް ދިމާވެފައިވާ ލޯޑް ބޮޑުވުމުގެ މައްސަލައަށް ބޮޑު ލުޔެއް ލިބިގެންދާނެ ކަމަށް އެ ކުންފުނިން މަޢުލޫމާތުދެއެވެ.
މިކަމާ ގުޅޭގޮތުން ފެނަކައިން އިތުރަށް ހާމަކުރި ގޮތުގައި، ރަށްރަށުގެ އިންޖީނުގެތަކުގެ ހާލަތު ރަނގަޅުކޮށް، ރައްޔިތުންނަށް އިތުބާރު ހުރި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަކީ ސަރުކާރުގެ މުހިންމު އަމާޒެކެވެ. މިގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ރަށްރަށުގެ ކަރަންޓުގެ ވިއުގަ ވަރުގަދަކުރުމުގެ މަސައްކަތް ފެނަކައިން ދަނީ ހަލުވިކަމާއެކު ކުރަމުންނެވެ.
ފަރެސްމާތޮޑާއަށް މިއަދު ގެންދެވުނު 800 ކިލޯވޮޓުގެ ޖެންސެޓް އިންޖީނުގެއަށް އިންސްޓޯލްކޮށް، ވީ އެންމެ އަވަހަކަށް ބޭނުންކުރަން ފެށުމަށް ކުރަންޖެހޭ މަސައްކަތްތައް މިހާރު ދަނީ ކުރަމުންނެވެ. މި އާ އިންޖީނުގެ ސަބަބުން ކުރިއަށް އޮތް ރަމަޟާން މަހާއި، ހޫނު މޫސުމުގައި ކަރަންޓަށް އަންނަ ލޯޑަށް އެކަށީގެންވާ ހައްލެއް ލިބިގެންދާނެ ކަމަށް އެރަށު ރައްޔިތުން އުންމީދު ކުރެއެވެ.
ކިޔުންތެރިންގެ ހިޔާލު