އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު، މ. އަތޮޅުން ޙާފިޒުކަމުގެ ސަނަދު ޙާޞިލުކުރި ފުރަތަމަ ޙާފިޒާ، ފާޠިމަތު މޫނިސާ މޫސާއާ މިއަދު ބައްދަލުކުރައްވައިފިއެވެ.
މިއަދު އިސްލާމީ ކަންތައްތަކާ ބެހޭ ވުޒާރާގައި ކުރިއަށްދިޔަ މި ޚާއްޞަ ބައްދަލުކުރެއްވުމުގައި، ވަޒީރު ވަނީ އަލްޙާފިޒާ ފާޠިމަތު މޫނިސާ މޫސާ ހޯއްދެވި ފުރިހަމަ ކާމިޔާބީއަށް މަރުޙަބާ ދަންނަވާފައެވެ. އަދި ކީރިތި ޤުރުއާނުގެ ރޮނގުން އިތުރަށް ކުރިއަށް ދިއުމަށް އެކަމަނާއަށް ނުހަނު ބޮޑަށް ހިތްވަރު ދެއްވާފައިވެއެވެ.
މ. މުއްޔަށް އުފަން އުމުރުން 19 އަހަރުގެ އަލްޙާފިޒާ ފާޠިމަތު މޫނިސާ މޫސާ، ޙާފިޒުކަމުގެ ސަނަދު ޙާޞިލުކުރައްވާފައިވަނީ 18 މޭ 2026 ގައެވެ. މި ޝަރަފުވެރި ސަނަދު އެކަމަނާ ޙާޞިލުކުރައްވާފައިވަނީ އެއްވަނަ ދަރަޖައިގައި ފާސްވެގެންނެވެ. މިއީ މ. އަތޮޅަށާއި މުޅި ދިވެހިރާއްޖެއަށް ލިބިގެންދިޔަ ވަރަށް ބޮޑު ފަޚުރެއް ކަމުގައި ފާހަގަކުރެވެއެވެ.
ކީރިތި ޤުރުއާން ހިތުދަސްކުރުމުގެ މަތިވެރި ނިޢުމަތް ޙާޞިލުކުރާ ފަރާތްތަކަށް ސަރުކާރުންނާއި އިސްލާމީ ކަންތައްތަކާ ބެހޭ ވުޒާރާއިން އަބަދުވެސް އަންނަނީ ޚާއްޞަ އަހައްމިއްޔަތުކަމެއް ދެމުންނެވެ. މިގޮތުން މިއަދުގެ ބައްދަލުވުމަކީވެސް ޤައުމުގެ ޒުވާނުން މި ރޮނގުން ކުރިއަށްދިއުމަށް ދެވުނު ވަރަށް ބޮޑު ހިތްވަރެއްކަމުގައި ބެލެވެއެވެ
ކިޔުންތެރިންގެ ހިޔާލު