ދިވެހިން އާންމުކޮށް ބޭނުންކުރާ ކާބޯތަކެތީގައި ކެމިކަލް އެކުލެވޭ މިންވަރު ދެނެގަތުމަށްޓަކައި، މޯލްޑިވްސް ފުޑް އެންޑް ޑްރަގް އޮތޯރިޓީން ބައިނަލްއަގުވާމީ ފަރާތްތަކާ ގުޅިގެން ހާއްސަ ދިރާސާއެއް ކުރުމަށް ނިންމައިފިއެވެ.
ދިވެހިން ކައިބޮއެ އުޅޭ ތަކެތީގައި ހިމެނޭ ކެމިކަލްގެ ބާވަތްތަކާއި އޭގެ މިންވަރު ސާފުކުރުމަށްޓަކައި ހާއްސަ މަސައްކަތްތަކެއް ވަނީ ފަށާފައެވެ. އެމްއެފްޑީއޭގެ ފުޑް ކޮލިޓީ އެޝުއަރެންސް ކޯޑިނޭޓަރު ހާލިސާ މުހައްމަދު ހާމަކުރެއްވި ގޮތުގައި، ދަނޑުތަކުގައި ހައްދާ ތަކެތި ޓެސްޓުކުރާނެ މެތަޑުތައް މިހާރު އަންނަނީ ތަރައްގީކުރަމުންނެވެ. އަދި ޓޯޓަލް ޑައިޓް ސްޓަޑީއެއް ހަދައި، ދިވެހިންގެ އާންމު ކެއުމުގައި ހިމެނޭ ތަކެތީގައި ހުރި ކެމިކަލްތައް ދެނެގަތުމުގެ މަސައްކަތް ކުރުމަށް ވަނީ ނިންމާފައެވެ.
ރާއްޖޭގައި ކެންސަރު ބަލި އިތުރުވަމުންދާތީ، އެއީ ކާބޯތަކެތީގައި ހުންނަ ކެމިކަލްގެ ސަބަބުން ދިމާވާ ކަމެއް ކަމަށް ބުނެ އާންމުން އަންނަނީ ކަންބޮޑުވުން ފާޅުކުރަމުންނެވެ. މިކަމާ ގުޅިގެން ކޮންޓެމިނޭޓް ދިރާސާ ހެދުމުން، ގިނައިން ހުންނަނީ ކެންސަރަށް މަގުފަހިވާ ކޮން ކެމިކަލެއްކަން ޔަގީންކަމާއެކު އެނގިގެންދާނެއެވެ. މިހާތަނަށް ރާއްޖޭގައި މިފަދަ ޔަގީން ސައިންޓިފިކް މައުލޫމާތެއް އެއްކުރެވިފައެއް ނުވެއެވެ.
މި ދިރާސާ ކުރިއަށް ގެންދިއުމަށްޓަކައި ޑަބްލިއުއެޗްއޯއާ ގުޅިގެން ޕްރޮޕޯސަލެއް ވަނީ އެކުލަވާލާފައެވެ. ފިނޭންސް މިނިސްޓްރީން މިހާރު އަންނަނީ އެކަމަށް ބޭނުންވާ ފަންޑު ހޯދުމުގެ މަސައްކަތް ކުރަމުންނެވެ. މީގެ އިތުރުން، ދިވެހިންގެ ކާބޯތަކެއްޗާ ގުޅޭ ސާވޭއެއް ހެދުމަށް ދިވެހިރާއްޖޭގެ ގައުމީ ޔުނިވަރސިޓީއާ ގުޅިގެން މަސައްކަތް ކުރުމަށްވެސް ވަނީ ރޭވިފައެވެ. ކާބޯތަކެތި ރައްކާތެރިކުރުމުގެ ގާނޫނުގެ ދަށުން އެމްއެފްޑީއޭއަށް ލާޒިމްކޮށްފައިވާ މި މަސައްކަތްތައް އަމަލީ ގޮތުން ފެށުމަށް ހަމަޖެހިފައިވަނީ ބޭނުންވާ ފަންޑު ހަމަޖެހުމުންނެވެ.
މިހާރުވެސް މާކެޓުގައި ހުންނަ ތަކެތީގެ ރެންޑަމް ސާމްޕަލް ނަގައިގެން އަންނަނީ ޓެސްޓު ކުރަމުންނެވެ. ނަމަވެސް، އާ މެތަޑުތައް ތަރައްގީވުމުން ދަނޑުތަކުން ތަކެތި ބާޒާރަށް ނެރުމުގެ ކުރިން ޓެސްޓު ކުރެވޭނެ ހަރުދަނާ އިންތިޒާމެއް ހަމަޖެހިގެންދާނެއެވެ. މިއީ އާންމު ސިއްހަތު ރައްކާތެރިކުރުމަށް އެޅޭ ވަރަށް މުހިންމު ފިޔަވަޅެކެވެ.
ކިޔުންތެރިންގެ ހިޔާލު