ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ހުސްވުމާ ގުޅިގެން ބޭއްވި ބައި-އިލެކްޝަންގައި ވާދަކުރެއްވި އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ކެންޑިޑޭޓު އަބްދުﷲ ސޯދިގު ބޮޑު ތަފާތަކުން ކާމިޔާބު ކުރައްވައިފިއެވެ.
މިއަދު ބޭއްވި އިންތިހާބުގެ ވޯޓު ފޮށިތައް ގުނުމަށްފަހު ލިބުނު ވަގުތީ ނަތީޖާތަކުން ދައްކާ ގޮތުގައި އަބްދުﷲ ސޯދިގަށް ވަނީ 804 ވޯޓު ލިބިވަޑައިގެންފައެވެ. އޭނާއާ ވާދަކުރެއްވި ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އަހުމަދު ސައީދަށް ލިބިވަޑައިގަތީ 644 ވޯޓެވެ. މީގެ ކުރިން އައްޑޫ ސިޓީގެ މޭޔަރުގެ މަގާމު ތިން ދައުރު ފުރުއްވާފައިވާ ސޯދިގު އިންތިހާބު ކާމިޔާބު ކުރެއްވިކަން މި ނަތީޖާތަކުން މިހާރު ވަނީ ކަށަވަރުވެފައެވެ.
މި އިންތިހާބުގެ ނަތީޖާއާއެކު ރައްޔިތުންގެ މަޖިލީހުގައި ހިމެނޭ ސިޔާސީ ޕާޓީތަކުގެ ގޮނޑީގެ އަދަދަށް ވަނީ ބަދަލުތަކެއް އައިސްފަ އެވެ. މި ކާމިޔާބީއާ ގުޅިގެން އެމްޑީޕީގެ މަޖިލިސް މެންބަރުންގެ ޖުމްލަ އަދަދު 12 އިން 13 އަށް އިތުރުވެފައިވާއިރު، ޕީއެންސީގެ މެންބަރުންގެ އަދަދު 75 އިން 74 އަށް ވަނީ ދަށްވެފައެވެ.
ހިތަދޫ އުތުރު ދާއިރާގެ ގޮނޑި ހުސްވީ އެ ދާއިރާގެ މެންބަރަކަށް ހުންނެވި ޕީއެންސީގެ މުހައްމަދު ސިނާންގެ ސާބިތު ދަރަންޏެއް ކޯޓު ހުކުމާ އެއްގޮތަށް ދައްކަވާފައި ނުވާތީ އެވެ. އެ މައްސަލަ ސުޕްރީމް ކޯޓަށް ހުށަހެޅުމުން، އެ ކޯޓުން ވަނީ ސިނާންގެ މެންބަރުކަމުގެ ގޮނޑި ގެއްލިފައިވާ ކަމަށް ކަނޑައަޅައިފަ އެވެ. މިއީ އެ ހުކުމަށްފަހު އެ ދާއިރާގެ ގޮނޑި ފުރުއްވަން ބޭއްވުނު ބައި-އިލެކްޝަނެވެ.
ކިޔުންތެރިންގެ ހިޔާލު