އެއްބަސްވުމެއް ހެދުމަށް އެމެރިކާގެ ރައީސް ޑޮނަލްޑް ޓްރަމްޕް އީރާނަށް ދީފައިވާ މުހުލަތު ހަމަވާން ގާތްވަމުންދާއިރު، ދެ ފަރާތުގެ ދެމެދުގައި އަދިވެސް އެއްވެސް ކަމެއްގައި އެއްބަސްވުމަކަށް ނާދެވެއެވެ.
ޕާކިސްތާނު މެދުވެރިގެން އީރާނާއި އެމެރިކާއިން އަދިވެސް ވާހަކަ ދައްކަމުން ގެންދާއިރު، ޚިޔާލު ތަފާތުވުންތަކުގެ ދުރުމިނާއި ފުންމިން ވަރަށް ބޮޑު ކަމަށް އީރާނުގެ އޮފިޝަލުންވަނީ ވިދާޅުވެފައެވެ.
ޕާކިސްތާނު އަސްކަރިއްޔާގެ ވެރިޔާ ފީލްޑް މާޝަލް ޖެނެރަލް ސައިދު އާސިމް މުނީރު ރޭގައިވަނީ ތެހެރާނަށް ވަޑައިގެންފައެވެ. އަދި އެއްބަސްވުމެއް ހެދުމުގެ މުހިންމު ކަމާއި، ކުރިމަތިލުމަކަށް ނުގޮސް މައްސަލަ ހައްލު ކުރެވޭނެ ގޮތަކާ ގުޅޭގޮތުން އީރާނުގެ ޚާރިޖީ ވަޒީރު އައްބާސް އަރަޣްޗީއާ މަޝްވަރާ ކުރައްވާފައި ވެއެވެ.
އެމެރިކާގެ ރައީސް ޓްރަމްޕް ކުރިން ބުނެފައިވަނީ، އެއްބަސްވުމެއް ހެދުމަށް އީރާނަށް އޮތީ ހުކުރު، ހޮނިހިރު ނުވަތަ އާދީއްތަ ދުވަސް ކަމަށެވެ. އެހާތަނަށް އެމެރިކާ ރުހޭފަދަ އެއްބަސްވުމަކަށް ނުދެވިއްޖެނަމަ ހަމަލާދޭން ފަށާނޭ ކަމަށެވެ.
އެއްބަސްވުމެއް ހެދުމުގެ މަޝްވަރާތައް ވަރަށް ބާރަށް ކުރިއަށް ދާއިރު، މިކަމުގައި ގަތަރު، މިސްރު، ސައުދީ އަރަބިއްޔާ، ތުރުކީންވެސް މުހިންމު ރޯލެއް އަދާކުރަމުން އެބަ ގެންދެއެވެ. ކުރިއަށްއޮތީ ދެގޮތެވެ. އެއްގޮތަކީ މަޝްވަރާއަށް އިތުރު ވަގުތު ދިނުމުގެގޮތުން ހަނގުރާމަ ހުއްޓާލާފައި އޮތް މުއްދަތު އިތުރު ކުރުމެވެ. ދެވަނަގޮތަކީ އެމެރިކާއިން އީރާނަށް ހަމަލާދޭން ފެށުމެވެ.
އީރާނު ސަރުކާރުގެ ޑިފެންސް މިނިސްޓްރީގެ ތަރުޖަމާނު ރިޟާ ތަލާއީ-ނިކް މިއަދު ވިދާޅުވީ، ގައުމެއްގެ ގޮތުގައި އީރާނަށް ހައްގުތަކެއް ލިބިގެންވާ ކަމަށް އެމެރިކާއިން ގަބޫލު ނުކުރުމަކީ، އެމެރިކާގެ ރައީސް އިތުރަށް ނާކާމިޔާބުވެ ބަލިވެގެންދާނޭ ކަމެއް ކަމަށެވެ.
ހަނގުރާމައިގެ މައިދާނުގައާއި، އަދި ޑިޕްލޮމެސީގައި އެމެރިކާއާއި ޒަޔަނިސްޓުންނަށް ހަނގުރާމައަކަށް ނުގޮސް ސަލާމަތްވެގެން އޮތް ހަމައެކަނި ގޮތަކީ އީރާނު ރައްޔިތުންގެ ޑިމާންޑްތަކަށް އެއްބަސްވުން ކަމަށް ރިޟާ ތަލާއީ-ނިކް ވިދާޅުވިއެވެ.
ޓްރަމްޕަށް އެންމެ ބުއްދިވެރިގޮތަކީ، ހަނގުރާމަކޮށްގެން އެމެރިކާގެ ރައްޔިތުންނާއި ބައިނަލްއަގްވާމީ މުޖުތަމައަށް އިތުރަށް ގެއްލުންވެ އަދި ހަރަދުތައް ހުއްޓުވަން އީރާނުގެ ހުށަހެޅުންތައް ގަބޫލުކުރުން ކަމަށްވެސް، އީރާނު ސަރުކާރުގެ ޑިފެންސް މިނިސްޓްރީގެ ތަރުޖަމާނު ވިދާޅުވިއެވެ.
އެމެރިކާގެ ރައީސް ޓްރަމްޕް ރޭގައިވަނީ އޭނާގެ ސެކިއުރިޓީ ޓީމާ ބައްދަލުކޮށް، އީރާނަށް ހަމަލާ ދިނުމަށް ގޮތެއް ނިންމަން މަޝްވަރާކޮށްފައެވެ. ނަމަވެސް، ހަމަލާ ދިނުމާމެދު ގޮތެއް ނިންމާފައި ނުވާ ކަމަށް ރިޕޯޓްތައް ބުނެއެވެ.
ކިޔުންތެރިންގެ ހިޔާލު