“ޢީދު ހަވީރު 1447” ގްރޭޓާ މާލެ ސަރަހައްދުގައި ކުލަގަދަކޮށް ފާހަގަކުރުމަށް ނިންމާފައިވާކަމަށް އެމްއެންޑީއެފުން ބުނެފިއެވެ.
ދިވެހިރާއްޖޭގެ ޤައުމީ ދިފާޢީ ބާރުން (އެމްއެންޑީއެފް) ވިލަރެސްކޮށްގެން ކުރިއަށްގެންދާ މި ހަރަކާތްތަކުގައި ސިފައިންނާއި ފުލުހުންގެ އިތުރުން، ދައުލަތުގެ 10 އެސްއޯއީއަކުން ބައިވެރިވާނެއެވެ.
އެމްއެންޑީއެފުން ބުނިގޮތުގައި ޢީދު ކުލަގަދަކޮށް ފާހަގަކުރަން ނިންމީ މި އަހަރުގެ ބަރަކާތްތެރި އަޟްޙާ ޢީދުގެ އުފަލުގައި ޢާއިލާތައް އެކުވެރި މާޙައުލެއްގައި ބައްދަލުވެ، ޢީދު އުފާ ފާހަގަކުރުމުގެ ފުރުޞަތު ފަހިކޮށްދިނުމުގެ ގޮތުންނެވެ.
މާލޭގައި ޢީދު ހަވީރުގެ ހަރަކާތްތައް އޮންނާނީ މޭ 27 އިން 29 އަށް، ސަލްޓަން ޕާކާއި، ޝަހީދުންގެ ބިނާ ސަރަހައްދު ހިމެނޭހެން ޖުމްހޫރީ މައިދާނާއި ރަސްމީ ބޮޑުފާލަން ސަރަހައްދުގައެވެ. މި ސަރަހައްދުތަކުގައި ވޯޓަރ ފައުންޓެއިން، ފޯމް ބާތް ޕޫލް، އަދި ރެޕަލިންގ ކުރުން ފަދަ ހަރަކާތްތައް ކުރިއަށްދާނެއެވެ. މީގެ އިތުރުން ސިފައިންގެ ޔުނިފޯމްތަކާއި، އޮޕަރޭޝަންތަކުގައި ބޭނުންކުރާ ހަތިޔާރާއި އުޅަނދުތައް ދައްކާލުމާއި، އެ ތަކެއްޗާއެކު ފޮޓޯ ނެގުމުގެ ފުރުޞަތު ލިބިގެންދާނެއެވެ.
ހުޅުމާލޭގައި މި ހަރަކާތްތައް ކުރިއަށްދާނީ ސެންޓްރަލް ޕާކާއި ފޭސް 2 ގެ ހިޔާ ޕާކް ސަރަހައްދުގައެވެ. ސެންޓްރަލް ޕާކުގައި ވޯޓަރ ސްލައިޑިންގ އާއި ރެޕަލިންގ ހިމެނޭއިރު، ހިޔާ ޕާކުގައި ފަޔަރ އިކުއިޕްމަންޓްސް ދައްކާލުމާއި ޓޭބަލް ލެޑަރއަށް އެރުން ފަދަ ކަންކަން އޮންނާނެއެވެ. ވިލިމާލޭގައި މޭ 27 އިން 30 އަށް ފުޓްބޯޅަ ދަނޑުގައި އޮބްސްޓިކަލް ކޯސްތަކާއި ކުޑަކުދިންގެ ތަފާތު ކުޅިވަރުތައް ކުރިއަށްދާނެއެވެ.
މި އަހަރުގެ ޢީދު ހަވީރުގައި ބައިވެރިވާ އެސްއޯއީތަކުގެ ތެރޭގައި ސްޓެލްކޯ، އެމްޑަބްލިޔުއެސްއީ، ވެމްކޯ، އެމްޕީއެލް، އެމްޓީސީސީ، އެމްއޭސީއެލް، މިފްކޯ، އާރުޑީސީ، އެޗްޑީސީ އަދި އެފްޑީސީ ހިމެނެއެވެ.
މީގެ އިތުރުން އެމްއެންޑީއެފްގެ އާޓްސް އެންޑް ސެރެމޯނިއަލް ސަރވިސްގެ ޚާއްޞަ ހުށަހެޅުންތަކެއް ވެސް މާލެ އާއި ހުޅުމާލޭގައި އޮންނާނެއެވެ.
މި ހަރަކާތްތައް ކުރިއަށްދާނީ މޭ 27 އިން 29 އަށް ކޮންމެ ދުވަހެއްގެ ހަވީރު 16:00 އިން 18:00 އަށެވެ.
ކިޔުންތެރިންގެ ހިޔާލު