އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން އިންތިޚާބަކީ ކުރީގެ ރައީސް މުޙައްމަދު ނަޝީދު ވާދަކުރައްވަންވީ އިންތިޚާބެއް ނޫން ކަމަށާއި، އެމަނިކުފާނު މިވަގުތު ހުންނަވަންވީ ގައުމީ އިސްލާހީ މަސައްކަތްތަކުގައި ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ، އެމްޑީޕީގެ ޗެއާޕާސަން އިންތިޚާބުގައި ވާދަކުރައްވާ ދެކުނު ގަލޮޅު ދާއިރާގެ މެމްބަރު މީކާއީލް އަޙްމަދު ނަސީމަށް ތާއީދު ހޯއްދެވުމަށް ބުދަ ދުވަހުގެ ރޭ ޅ. ހިންނަވަރުގައި ބޭއްވި ޖަލްސާގައެވެ.
މި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، ކަންކަން ކުރެވޭނީ ހަމައެކަނި އެއް ބަޔަކަށް ކަމަށް ދެކި، ތަޖުރިބާ މަދުވުމުގެ ނަމުގައި އެހެން ފަރާތްތައް އެކަހެރިކުރުމަކީ ސިޔާސީ ލީޑަރުން ހެދޭ ގޯހެއް ކަމަށެވެ. އެމްޑީޕީއަށް އާ ލީޑަރޝިޕެއް ގެންނަންވީ ވަގުތު ޖެހިއްޖެ ކަމަށް ވެސް އެމަނިކުފާނު ވިދާޅުވިއެވެ.
ރައީސް ނަޝީދަކީ އެމްޑީޕީގެ ފުރަތަމަ ޗެއާޕާސަންކަމާއި، ޕާޓީގެ ރައީސްކަމާއި، އަދި ގައުމުގެ ރައީސްކަން ކުރައްވާފައިވާ ތަޖުރިބާކާރު ސިޔާސީ ބޭފުޅެއްކަން ފާހަގަކުރައްވައި، ރައީސް ޞާލިޙް ވިދާޅުވީ، އެފަދަ ބޭފުޅަކާ ވާދަކުރެވޭ ފެންވަރުގެ ޒުވާން ސިޔާސީ ބޭފުޅުން ޕާޓީން އުފެދެމުން އަންނާތީ ފަޚުރުވެރިވާ ކަމަށެވެ.
“ރައީސް ނަޝީދު މި އިންތިޚާބުގައި ވާދަކުރައްވަން ޖެހޭ ކަމަކަށް އަޅުގަނޑު ނުދެކެން. މިވަގުތަކީ އެމަނިކުފާނު އަޅުގަނޑުމެންނާއެކު ޔުނައިޓެޑް ޑިމޮކްރެޓިކް ފްރަންޓްގައި ހުންނަވައި، ގައުމު އިސްލާހު ކުރުމަށް އަޅުގަނޑުމެން ތިން ރައީސުން ފެށި މަސައްކަތްތައް ކުރިއަށް ގެންދަންވީ ވަގުތު،” ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ، ޕާޓީގެ ކުރީގެ އިސް ބޭފުޅުން މަގާމުތަކުން ދުރަށް ޖެހިވަޑައިގެން، އާ ލީޑަރުންނާ ޒިންމާތައް ހަވާލުކުރައްވާތަން ދެކެވަޑައިގަންނަވަން ބޭނުންފުޅުވާ ކަމަށެވެ. އާ ޖީލެއްގެ ލީޑަރުން އުފެއްދުމަށް ނުކުޅެދިއްޖެނަމަ، ޕާޓީގެ މަގުބޫލުކަން ގެއްލިދާނެ ކަމުގެ އިންޒާރު ވެސް އެމަނިކުފާނު ދެއްވިއެވެ.
ގައުމުގެ ވޯޓުލާ އާބާދީގެ 40 އިންސައްތައަކީ ޒުވާނުން ކަމުގައިވީ ނަމަވެސް، ޕާޓީގެ ތެރޭގައި ޒުވާނުންގެ ނިސްބަތް 17 އިންސައްތައަށް ދަށްވެފައިވާކަން އެމަނިކުފާނު ފާހަގަކުރެއްވިއެވެ. ރައީސް ނަޝީދުގެ ޚިދުމަތްތަކަށް އިހުތިރާމު ކުރައްވާ ކަމަށާއި، ނަމަވެސް މީކާއީލަށް ތާއީދު ކުރެއްވީ ޕާޓީގެ ކުރިމަގަށް އޮތް ވިސްނުމެއްގެ މައްޗަށް ބިނާކޮށް ކަމަށް ޞާލިޙް ވިދާޅުވިއެވެ.
މީކާއީލަކީ ޕާޓީ ތަރައްގީ ކުރާނެ ގޮތުގެ ސާފު މެނިފެސްޓޯއަކާއެކު އިންތިޚާބަށް ނުކުމެވަޑައިގެންނެވި ބޭފުޅެއް ކަމަށާއި، ޕާޓީގެ ރިޔާސީ ޕްރައިމަރީގައި ވަކި ފަރާތަކަށް ނުޖެހޭ ރެފްރީއެއްގެ ގޮތުގައި މީކާއީލް ދެމިހުންނަވާނެ ކަމުގެ ފުރިހަމަ އިތުބާރު އެބައޮތް ކަމަށް ވެސް ރައީސް ޞާލިޙް ވިދާޅުވިއެވެ.
ކުރީގެ ރައީސް މައުމޫން އަބްދުލް ގައްޔޫމްގެ 30 އަހަރުވީ ދިގު ވެރިކަމުގެ ސަބަބުން ދެ ޖީލެއްގެ ލީޑަރުންނަށް ފުރުސަތުތައް ގެއްލިގެން ދިޔަ ކަމަށާއި، އެފަދަ ކަމެއް އެމްޑީޕީގެ ތެރޭގައި ތަކުރާރުވާން އެމަނިކުފާނު ނޭދޭ ކަމަށް ވިދާޅުވިއެވެ. އެންމެ މުހިންމު މަސައްކަތަކީ ޔުނައިޓެޑް ޑިމޮކްރެޓިކް ފްރަންޓްގެ ތެރެއިން ސަރުކާރު ބަދަލުކޮށް، ގައުމު އިސްލާހު ކުރުން ކަމަށް ރައީސް ޞާލިޙް ތަކުރާރުކުރެއްވިއެވެ.
ކިޔުންތެރިންގެ ހިޔާލު