ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބުގައި ވާދަކުރެއްވުމާމެދު އަދި ވަކި ގޮތެއް ނިންމަވާފައި ނުވާކަމަށް ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު މިއަދު ވިދާޅުވެއްޖެއެވެ.
އެމްޑީޕީގެ ޗެއާޕާސަން ހޮވުމަށް މިއަދު ކުރިއަށްދިޔަ އެތެރޭގެ އިންތިހާބުގައި ވޯޓުލެއްވުމަށްފަހު ރައީސް ސޯލިހު ވަނީ ނޫސްވެރިންނާ މުހާތަބުކުރައްވާފައެވެ. އެމަނިކުފާނު ވިދާޅުވީ ޗެއާޕާސަންގެ މަގާމަށް އިންތިހާބުވާ ކޮންމެ ބޭފުޅަކަށްވެސް އެމަނިކުފާނުގެ ފުރިހަމަ އިހުތިރާމު އޮންނާނެ ކަމަށެވެ. އަދި އިންތިހާބު ކާމިޔާބު ކުރައްވާ ބޭފުޅެއްގެ ފަހަތްޕުޅުގައި ސާބިތުކަމާއެކު މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
މި އިންތިހާބުގައި ރައީސް ސޯލިހު ތާއީދު ކުރައްވަނީ މީކާއީލް އަހުމަދު ނަސީމަށެވެ. މީކާއީލްއާ ވާދަކުރައްވަނީ ކުރީގެ ރައީސުލްޖުމްހޫރިއްޔާ މުހައްމަދު ނަޝީދެވެ. އިންތިހާބުގެ ފޯރިގަދަ ކެމްޕެއިނާ ގުޅިގެން އުފެދިފައިވާ ސިޔާސީ ވާދަވެރިކަމަށް އިޝާރާތް ކުރައްވައި ރައީސް ސޯލިހު ވަނީ ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ ރައީސް ނަޝީދާ ދެމެދު އެއްވެސް ޒާތީ މައްސަލައެއް ނެތް ކަމަށެވެ. އަދި ކުރިމަގުގައި ވެސް ދެ ބޭފުޅުން އެކުގައި މަސައްކަތް ކުރެއްވުމުގެ ފުރުސަތު އޮތް ކަމަށް އެމަނިކުފާނު ފާހަގަކުރެއްވިއެވެ.
ސިޔާސީ ޕާޓީތަކުން ރިޔާސީ ރޭހަށް ނެރެނީ އެންމެ ކެންޑިޑޭޓެއްކަން ރައީސް ސޯލިހު ފާހަގަކުރެއްވިއެވެ. ކުރިއަށް އޮތް ރިޔާސީ އިންތިހާބުގައި އެމްޑީޕީގެ ފަރާތުން ކޮންމެވެސް ބޭފުޅަކު ވާދަކުރައްވާނެ ކަމަށް އެމަނިކުފާނު ވިދާޅުވިއެވެ. މީގެ އިތުރުން ކުރިއަށް އޮތް ދައުރުގައިވެސް އޮންނާނީ އެމްޑީޕީގެ ވެރިކަމެއް ކަމަށް ގަބޫލުފުޅު ކުރައްވާ ކަމަށްވެސް އެމަނިކުފާނު ވިދާޅުވިއެވެ.
ކިޔުންތެރިންގެ ހިޔާލު