މާލެ ސަރަހައްދުގައި މިދުވަސްވަރު ވަރަށް ބޮޑަށް ރޯގާ ފެތުރެމުންދާތީ، ކޮންމެހެން ދާންޖެހޭ މަޖުބޫރު ހާލަތެއްގައި މެނުވީ ހޮސްޕިޓަލްތަކަށް ނުދިއުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ން އިލްތިމާސްކޮށްފިއެވެ.
އައިޖީއެމްއެޗުން ރޭ އެކްސްގައި ކުރި ޕޯސްޓެއްގައި ބުނީ މާލެ ސަރަހައްދުގައި ބަލި ފެތުރުން އިތުރުވަމުންދާތީ، ބަލިން ރައްކާތެރިވުމުގެ ފިޔަވަޅެއްގެ ގޮތުން ހޮސްޕިޓަލަށް ދިއުން މަދުކުރުމަކީ މުހިންމު ކަމެއް ކަމަށެވެ. އަދި ހުން އައުމާއެކު ހަންގަނޑުގައި ބިހި ނެގުން ފަދަ އަލާމާތްތައް ފެންނަ ނަމަ، ލަސްނުކޮށް މާސްކު އަޅައިގެން ޑޮކްޓަރަށް ދެއްކުމަށް އިލްތިމާސްކުރާ ކަމަށެވެ.
ބަލީގެ އަލާމާތްތައް ހުންނަ މީހުން ބަހާއި ފެރީ ފަދަ އާންމު ދަތުރުފަތުރުގެ ވަސީލަތްތައް ބޭނުން ނުކުރުމަށްވެސް އައިޖީއެމްއެޗުންވަނީ އެދިފައެވެ. ބަލިތަކުން ދިފާއުވުމަށްޓަކައި ސާފުތާހިރުކަމަށް އިސްކަންދިނުމަށާއި، ކުޑަކުދިންނަށް ދޭންޖެހޭ ގައުމީ ތާވަލުގެ ވެކްސިންތައް ހަމައަށް ފުރިހަމަކުރުމަށް އިލްތިމާސްކުރާކަމަށް އައިޖީއެމްއެޗުން ބުންޏެވެ.
އަދި ކެއްސާ ކިނބިހި އަޅާއިރު ޓިޝޫ ނުވަތަ އަތުގެ އުޅަނބޮށި ބޭނުންކޮށްގެން އަނގަޔާއި ނޭފަތް ނިވާކުރުމަކީ އެހެން މީހުންނަށް ބަލި ފެތުރުން ހުއްޓުވުމަށް ކުރެވިދާނެ މުހިންމު ކަމެއް ކަމަށް އައިޖީއެމްއެޗުން ބުންޏެވެ.
މީހުން ގިނައިން އެއްވެ އުޅޭ ތަންތަނަށް ދިއުން މަދުކުރުމަށާއި، އެފަދަ ތަންތަނަށް ދާންޖެހޭ ހާލަތްތަކުގައި މާސްކު އެޅުމަށް ސަމާލުކަން ދޭންޖެހޭ ކަމަށެވެ. އަދި ބަލީގެ އެއްވެސް އަލާމާތެއް ފެނިއްޖެނަމަ އަމިއްލައަށް ބޭސްކުރުމުގެ ބަދަލުގައި ސިއްހީ މާހިރެއްގެ ލަފާ ހޯދުމަށާއި، މަދިރި އާލާވާ ފަދަ ތަންތަން ނައްތާލައި މާހައުލު ސާފުކޮށް ބެލެހެއްޓުމަށްވެސް އައިޖީއެމްއެޗުން ވަނީ އިލްތިމާސްކޮށްފައެވެ.
ކިޔުންތެރިންގެ ހިޔާލު