ކުރިއަށް އޮތް ހޫނު މޫސުމާ ދިމާކޮށް، ސްވިޒަލޭންޑުގެ އޭޑަލްވައިސް އެއާއިން ރާއްޖެއަށް ކުރާ ދަތުރުތައް އިތުރުކުރުމަށް ނިންމާފައިވާ ކަމަށް އެމްއޭސީއެލް އިން ހާމަކޮށްފިއެވެ.
އެމްއޭސީއެލް އިން ބުނީ ޖުލައި 4 އިން ސެޕްޓެމްބަރު 13 ގެ ނިޔަލަށް ދަތުރުތައް އިތުރުކުރަން އެ އެއާލައިނުން ނިންމާފައިވާ ކަމަށެވެ. އެގޮތުން ކޮންމެ ހަފުތާއެއްގެ ބުދަ އަދި ހޮނިހިރު ދުވަހު ދަތުރުތައް ބާއްވާނެއެވެ. މި މުއްދަތުގެ ތެރޭގައި ޖުމްލަ 21 އިތުރު ދަތުރު ރާއްޖެއަށް ކުރުމަށް ވަނީ ތާވަލުކޮށްފައެވެ.
އޭޑަލްވައިސް އެއާއަކީ ސްވިޒަލޭންޑުގެ ތިންވަނައަށް އެންމެ ބޮޑު އެއާލައިނެވެ. އެ އެއާލައިނުން ރާއްޖެއަށް ދަތުރުތައް ފަށާފައިވަނީ 4 ނޮވެމްބަރު 2000 ގައެވެ. މިއަހަރަކީ އެ އެއަރލައިނުން ރާއްޖެއަށް ޚިދުމަތް ދޭތާ 25 އަހަރު ފުރޭ އަހަރެވެ.
އިންޑަސްޓްރީގެ މާހިރުން ދެކޭގޮތުގައި، ދަތުރުތައް އިތުރުކުރުމަށް ނިންމި މި ނިންމުމަކީ ބައިނަލްއަގުވާމީ މާކެޓުގައި ރާއްޖެއަށް އޮތް މަގުބޫލުކަމާއި ޑިމާންޑް އިތުރުވަމުންދާކަން ހާމަކޮށްދޭ ކަމެކެވެ. އަދި މީގެ ސަބަބުން ރާއްޖޭގެ ފަތުރުވެރިކަމަށް އިތުރު ކުރިއެރުމެއް ލިބިގެންދާނެއެވެ.
ކިޔުންތެރިންގެ ހިޔާލު