ފަތުރުވެރިކަމާއި މަދަނީ އުދުހުންތަކާބެހޭ ވުޒާރާގެ ތަފާސްހިސާބުތަކުން ދައްކާގޮތުގައި، މިމަހުގެ މިހާތަނަށް ރާއްޖެއަށް ޒިޔާރާތްކުރި ފަތުރުވެރިންގެ އަދަދު 16.1 އިންސައްތަ އިތުރުވެފައިވެއެވެ. މެދުއިރުމަތީގެ ހަނގުރާމައާ ގުޅިގެން ރާއްޖެއަށް ޒިޔާރާތްކުރަމުންދިޔަ ފަތުރުވެރިންގެ އަދަދު ދަށްވަމުންދިޔަ ނަމަވެސް، ސަރުކާރާއި ދާއިރާގެ ހިއްސާދާރުން ގުޅިގެން ކުރި މަސައްކަތުގެ ސަބަބުން މިހާރު ފަތުރުވެރިންގެ އަދަދަށް ހެޔޮ ބަދަލެއް އައިސްފައިވާކަން މި ތަފާސްހިސާބުތަކުން ދައްކައެވެ.

ފަތުރުވެރިކަމާބެހޭ ވުޒާރާއިން އާންމުކޮށްފައިވާ ތަފާސްހިސާބުތަކުން ފެންނަގޮތުގައި، މިމަހުގެ މިހާތަނަށް ރާއްޖެއަށް 147,201 ފަތުރުވެރިން ވަނީ ޒިޔާރާތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރާތްކުރި 126,830 ފަތުރުވެރިންނާ އަޅާ ބަލާއިރު 16.1 އިންސައްތަ އިތުރު އަދަދެކެވެ.

ނަމަވެސް، މިމަހުގެ ފަތުރުވެރިންގެ އަދަދު ބޮޑުތަނުން އިތުރުވެފައިވީނަމަވެސް، އަހަރުގެ މިހާތަނަށް ރާއްޖެއަށް ޒިޔާރާތްކުރި ފަތުރުވެރިންގެ ޖުމްލަ އަދަދު އުޅެނީ 1.8 އިންސައްތަ ދަށްކޮށެވެ. އެގޮތުން އަހަރުގެ މިހާތަނަށް 1,750,222 ފަތުރުވެރިން ޒިޔާރާތްކޮށްފައިވާއިރު، މިދިޔަ އަހަރުގެ މި މުއްދަތުގައި ޒިޔާރާތްކޮށްފައިވަނީ 1,782,523 ފަތުރުވެރިންނެވެ.

އިޝްތިހާރު އިޝްތިހާރު

އެންމެ ގިނައިން ފަތުރުވެރިން ޒިޔާރާތްކުރި ފަސް ޤައުމުތަކަކީ:

  1. ޗައިނާ: 326,741 ފަތުރުވެރިން

  2. ރަޝިއާ: 248,739 ފަތުރުވެރިން

  3. އިނގިރޭސިވިލާތް: 131,996 ފަތުރުވެރިން

  4. ޖަރުމަނުވިލާތް: 115,814 ފަތުރުވެރިން

  5. އިޓަލީވިލާތް: 103,504 ފަތުރުވެރިން

މިއަހަރު ސަރުކާރުން ކަނޑައެޅި އަމާޒަކީ، 2.5 މިލިޔަން ފަތުރުވެރިން ރާއްޖެއަށް ގެނައުމަށެވެ. ނަމަވެސް މެދުއިރުމަތީގެ ހަމަނުޖެހުމާ ގުޅިގެން ދުނިޔޭގެ ވައިގެ ދަތުރުފަތުރަށް އައި ލޮޅުމުގެ އަސަރު ރާއްޖޭގެ ފަތުރުވެރިކަމަށްވެސް ވަނީ ކޮށްފައެވެ. ފަތުރުވެރިކަމާ ބެހޭ ވަޒީރު މުޙައްމަދު އަމީން ވިދާޅުވެފައިވަނީ، ރާއްޖެއިން އިންޑަސްޓްރީއާއެކު ގުޅިގެން ކުރި މަސައްކަތްތަކުގެ ނަތީޖާ ވަރަށް ރަނގަޅު ކަމަށާއި، އަހަރުގެ ފަހު ކުއާޓަރުގައި ފަތުރުވެރިންގެ އަދަދުތައް ރަނގަޅުވާނެ ކަމަށެވެ. މިހާރުވެސް މި ސީޒަންގައި އިތުރު 7 އެއަރލައިނެއްގެ ދަތުރުތައް ބޭއްވުމަށް ހަމަޖެހިފައިވާކަމަށްވެސް ވަޒީރު އަމީން ވަނީ ވިދާޅުވެފައެވެ.