ރަށްރަށުގެ ކައުންސިލްތަކުގެ ވިސްނުމާ އެއްގޮތަށް ފަތުރުވެރިކަމުގެ މަޝްރޫއުތައް ރާވައި ހިންގުމަށް ބޭނުންވާ ފަންނީ އެއްބާރުލުން ސަރުކާރުން ފޯރުކޮށްދެމުން އަންނަ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާއިން ހާމަކޮށްފިއެވެ.
ދައުލަތުގެ މީޑިއާ، ޕީއެސްއެމްގެ ”ރާއްޖެ މިއަދު” ޕްރޮގްރާމުގައި ވާހަކަދައްކަވަމުން ފަތުރުވެރިކަމާ ބެހޭ ވުޒާރާގެ ސްޓޭޓް މިނިސްޓަރު ޢަބްދުﷲ ނިޔާޒު ވިދާޅުވީ، ރާއްޖޭގެ އެކި ހިސާބުތަކަށް ޓޫރިޒަމް ފުޅާކުރުމަށްޓަކައި ލޯކަލް ކައުންސިލްތަކާ ގާތުން ގުޅިގެން ގިނަ މަސައްކަތްތަކެއް ކުރެވެމުންދާ ކަމަށެވެ. އެގޮތުން، ކައުންސިލްތަކާ މަޝްވަރާކޮށް އެމްއޯޔޫތައް ހަދައި، އެ ރަށްރަށަށް އެންމެ އެކަށޭނަ ފަތުރުވެރިކަމުގެ ޕްރޮޑަކްޓްތައް ތަޢާރަފުކުރުމަށާއި، ބިޑް ޑޮކިއުމެންޓް ތައްޔާރުކުރުން ފަދަ ކަންކަމުގައި ފަންނީ ލަފަޔާއި އެހީތެރިކަން ވުޒާރާއިން ފޯރުކޮށްދެމުންދާ ކަމަށް އޭނާ ވިދާޅުވިއެވެ.
“ކައުންސިލްތަކާއެކުވެސް އެމީހުން ބޭނުންވާފަދަ ގޮތަކަށް ޕްލޭންކޮށްގެން މަޝްވަރާކޮށްގެން އެމްއޯޔޫތައްވެސް ހަދައިގެން އެބޭފުޅުންނަށް އެބޭނުންވާ ފަންނީ އެހީތެރިކަމާއި އެއްކޮށް އެކަންކަން އެބޭފުޅުންނަށް ފަހިކޮށްދީގެން، އަޅުގަނޑުމެން އެބޭފުޅުންނާ ގުޅިގެން ފާހަގަކޮށްފަ ހުންނަ ސަރަހައްދުތަކަށް އެބޭފުޅުން ގެންނަން ބޭނުންވާ ޕްރޮޑަކްޓުތައް ގެނެވޭތޯ އެހީތެރިވެ ބިޑް ޑޮކިއުމެންޓޭޝަންއާއި އެކަހަލަ އެބޭފުޅުން ބޭނުންވާ ފަންނީ ލަފައެއް ދީގެން އެބޭފުޅުންނާ ވަރަށް ގާތުން މަސައްކަތް ކުރަމުންމިދަނީ،” ނިޔާޒު ވިދާޅުވިއެވެ.
ސަރުކާރުން މުޅި ރާއްޖެއަށް ފަތުރުވެރިކަން ފުޅާކުރުމަށް ގެންގުޅޭ ސިޔާސަތުގެ ދަށުން، އުތުރާއި ދެކުނުގެ ރަށްތަކާއި ފަޅުތައް ޓޫރިޒަމަށް ދޫކުރުމުގެ އިތުރުން މީހުން ދިރިއުޅޭ ރަށްރަށުގައި ލޯކަލް ޓޫރިޒަމް ކުރިއެރުވުމަށް ހާއްސަ އިސްކަމެއް ދެމުންދާކަން ސްޓޭޓް މިނިސްޓަރު ފާހަގަކުރެއްވިއެވެ. މީގެ ސަބަބުން ރަށްރަށުގެ އިޤްތިޞާދަށާއި އުމްރާނީ ތަރައްޤީއަށް ބޮޑެތި ކުރިއެރުންތަކެއް ލިބި، ދާއިރާގެ އެނދުތަކުގެ އަދަދު އިތުރުވެގެންދާނެއެވެ.
މީގެއިތުރުން ނިޔާޒު ވިދާޅުވީ، މިހާތަނަށް ރާއްޖޭގެ ފަތުރުވެރިކަން މެދުރާއްޖެތެރެއަށް ބޮޑަށް ބަރޯސާވެފައި އޮތް އޮތުން ނިމުމަކަށް ގެނައުމަށް ސަރުކާރުން މަސައްކަތް ކުރަމުންދާ ކަމަށެވެ. އެގޮތުން އެއާޕޯޓެއް ދެމެހެއްޓެނިވި ގޮތެއްގައި ހިންގުމަށްޓަކައި އެ ސަރަހައްދެއްގައި މަދުވެގެން 6،000 އާއި 8،000 އާ ދެމެދުގެ އެނދު ބޭނުންވާތީ، ވައިގެ ބަނދަރުތަކާ ގުޅުވައިގެން ފަތުރުވެރިކަމުގެ ބޮޑެތި މަޝްރޫޢުތައް ރާވާފައިވާ ކަމަށްވެސް އޭނާ ވިދާޅުވިއެވެ.
ސަރުކާރުގެ މައިގަނޑު އަމާޒަކީ ވަކި ސަރަޙައްދެއް އިސްތިސްނާނުކޮށް، ދިވެހި ހުރިހާ ރައްޔިތުންނަށްވެސް ފަތުރުވެރިކަމުގެ މަންފާއާއި ނަފާ ހަމަހަމަކަމާއެކު ލިބިގެންދާނެ ފަދަ ޝާމިލު ސިޔާސަތެއް ތަންފީޒުކުރުން ކަމަށްވެސް ސްޓޭޓް މިނިސްޓަރު ނިޔާޒު ވިދާޅުވިއެވެ.
ކިޔުންތެރިންގެ ހިޔާލު