ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބުގައި ކޮންމެ ގޮތަކަށް ނަތީޖާ ނިކުތް ނަމަވެސް އެއްވެސް ރަށެއް ތަފާތުނުކޮށް ތަރައްގީގެ މަޝްރޫއުތައް ކުރިއަށްގެންދަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އއ. އުކުޅަހާއި ތޮއްޑުއާ ރަސްދޫއިން ލިބުނު ކާމިޔާބީ ފާހަގަކުރުމަށް މިރޭ ރަސްދޫގައި ބޭއްވި އުފާފާޅުކުރުމުގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ މުޅި ރާއްޖެއިން ކޮންގްރެސް ޕާޓީއަށް ބޮޑު ކާމިޔާބީއެއް ލިބިފައިވާ ކަމަށެވެ. ނަމަވެސް ސިޓީތަކާއި ފެންނަ ނުފެންނަ ވޯޓުން ބޮޑު ނާކާމިޔާބީއެއް ވެސް ލިބުނުކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ އިންތިޚާބުގެ ނަތީޖާ ކޮންމެ ގޮތަކަށް ނިކުތް ނަމަވެސް ސަރުކާރުން ހުރިހާ ރަށަކަށް ހަމަހަމަ ކަމާއެކު ފުރިހަމަ އެއްބާރުލުމާއި ތާއީދު ދޭނެ ކަމަށެވެ. އަދި ހުރިހާ ކައުންސިލްތަކަކާ ގުޅިގެން މަސައްކަތްކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
އެއްވެސް ކައުންސިލަކުން ހުރަހެއް އަޅާނަމަ އެކަމެއް ރައްޔިތުންނަށް ސާފުކޮށްދެއްވައި، އެޅި ހުރަހެއް ނައްތާލައި ތަރައްގީގެ މަޝްރޫއުތައް ކުރިއަށްގެންދަވާނެ ކަމަށް ވެސް އެމަނިކުފާނު ވިދާޅުވިއެވެ.
ގޮންގްރެސް ޕާޓީގެ ޓިކެޓްގައި އިންތިހާބު ކާމިޔާބު ކުރެއްވި ބޭފުޅުން ވެސް ހަމަހަމަކަމާއެކު ރައްޔިތުންނަށް ޚިދުމަތްކޮށްދިނުމަށް އެމަނިކުފާނު އިލްތިމާސްކުރެއްވިއެވެ.
ތޮއްޑޫ ދާއިރާގެ ތިން ރަށުން ޕީއެންސީއަށް ލިބުނު ކާމިޔާބީ ފާހަގަކުރަން މިރޭ ވަނީ ހަވާވެސް އަރުވާފައެވެ.
ކިޔުންތެރިންގެ ހިޔާލު