އެމެރިކާއާއި އިޒްރޭލުން އިސްވެ އީރާނަށް ދިން ވައިގެ ހަމަލާތަކާ ގުޅިގެން ފްލައިޓުތައް ކެންސަލްވުމުގެ ސަބަބުން މި ރޯދަމަހުގެ ފަހު 10 އެއްގައި އުމްރާގެ އަޅުކަމަށް ނުފުރިފައި ތިބި ދިވެހިން ފުރުވާލުމުގެ މަސައްކަތް ސަރުކާރުން ފަށައިފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

“ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މިހާރު ނުފުރި ތިބި 150 މީހުންގެ އިތުރުން ވެސް ޖާގައެއް ހޯދަން ބޭނުންވާ މީހުންނަށް ޖާގަ ހުރި މިންވަރަކުން ދޭނަން. ވަގުތު ކުޑަތަންވެފައި ވުމުން މިކަމުގައި ހުރި ދަތިތައް ހައްލުވޭތޯ މަސައްކަތްކުރަމުންދާ ވާހަކަ ދަންނަވަން،” ޝަހީމް

ޝަހީމް، މީޑިއާތަކަށް ފޮނުވި މެސެޖެއްގައި ރޭ ވިދާޅުވީ މެދުއިރުމަތީގެ ވައިގެ ސަރަހައްދުތައް ބަންދުކުރުމުގެ ސަބަބުން 150 އެއްހާ ދިވެހިންނަށް އުމްރާއަށް ނުފުރިފައިވާ ކަމަށެވެ. އެ 150 މީހުންނަކީ ބައެއް ގައުމުތައް މެދުވެރިކޮށް ޓްރާންސިޓްކޮށް ދަތުރުކުރަން ހަމަޖެހިފައި ތިބި މީހުން ނަމަވެސް، ފްލައިޓުތައް ކެންސަލްވުމުން ދަތުރު ވަނީ ހުއްޓިފައިކަމަށް މިނިސްޓަރު ވިދާޅުވިއެވެ.

އެ މައްސަލައަށް އަވަސް ހައްލެއް ހޯދުމަށް ރައީސް ޑރ. މުހައްމަދު މުއިއްޒު ދެއްވި އިރުޝާދާ އެއްގޮތަށް، އިސްލާމިކް މިނިސްޓްރީއާއި، މޯލްޑިވްސް ހައްޖު ކޯޕަރޭޝަން އަދި މޯލްޑިވިއަންއާ ގުޅިގެން މިހާރު ދަނީ މަސައްކަތްތަކެއް ކުރަމުންކަމަށް ޝަހީމް ވިދާޅުވިއެވެ.