އދގެ އާންމު މަޖިލީހުގައި ޗައިނާއިން އެމެރިކާއަށް ނުސީދާ ވަރުގަދަ ބަހުގެ ހަމަލާތަކެއް ދީފިއެވެ.
އދގެ އާންމު މަޖިލީހުގައި މިއަދު ތަގުރީރު ކުރައްވަމުން ޗައިނާގެ ނައިބް ރައީސް ހަން ޗެންގް ވަކި ގައުމެއްގެ ނަން ވިދާޅެއް ނުވެއެވެ.
އެހެން ނަމަވެސް ވިދާޅުވީ، ގަލްފްގައި ހިމެނޭ ހުރިހާ ގައުމެއްގެ އިސްތިގުލާލަށް އެންމެންވެސް އިހުތިރާމްކުރަން ޖެހޭނޭ ކަމަށެވެ. އދގެ ޗާޓަރާ ހިލާފަށް އަދި ސަލާމަތީ މަޖިލީހުގެ ހުއްދަނެތި ވަކި ބަޔަކު އަސްކަރީ އުދުވާނުތައް ހިންގުމަކީ ޗައިނާ ވަރަށް ބޮޑަށް ދެކޮޅު ކަމެއް ކަމަށް ނައިބް ރައީސް ހަން ޗެންގް ވިދާޅުވިއެވެ.
ބައިނަލްއަގްވާމީ ސުލްހައާއި ސަލާމަތް ރައްކާތެރިކުރުމުގެ ގޮތުން ބޮޑެތި ގައުމުތަކުން ޚާއްސަ ޒިންމާތަކެއް އަދާކުރަންޖެހޭ ކަމަށާއި، ބޮޑެތި ގައުމުތައް ވާންޖެހޭނީ ގާނޫނުތަކަށް ތަބާވުމާއި، ގާނޫނުގެ ވެރިކަން ދަމަހައްޓައި، ރަނގަޅު ކަންތައްތައް ކުރުމުގައި އިސްކޮށް ތިބެންޖެހޭ ބަޔަކަށް ކަމަށް ޗައިނާގެ ނައިބް ރައީސް ވިދާޅުވިއެވެ.
ގަލްފް ހިމެނޭގޮތަށް މުޅި މެދުއިރުމަތީގެ ގައުމުތަކުގެ އިސްތިގުލާލާއި ސަލާމަތަށް ހުރިހާ ގައުމަކުންވެސް އިހުތިރާމް ކުރަންޖެހޭ ކަމަށް ޗައިނާ ގަބޫލުކުރާ ކަމަށް ހަން ޗެންގް ވިދާޅުވިއެވެ.
ފަލަސްތީނު މައްސަލައަށް އިޝާރާތް ކުރައްވައި ޗައިނާގެ ނައިބް ރައީސް ވަނީ، މައްސަލަ ހައްލުކުރުމަށްޓަކައި ދެ ދައުލަތުގެ ހައްލަށް އެނބުރި ދާންޖެހޭ ކަމަށާއި، އެކަމަށް ވީހާވެސް އަވަސް މަސައްކަތްތަކެއް ކުރަން ގޮވާލައްވާފައެވެ. އަދި ޣައްޒާ އަލުން ބިނާކުރުމުގެ މަސައްކަތް ފެށުމަށްވެސް ގޮވާލެއްވިއެވެ.
ކިޔުންތެރިންގެ ހިޔާލު