އެމެރިކާ އާއި އިޒްރޭލް އިސްވެ އޮވެ، އިރާނަށް ހަމަލާދީ މެދުއިރުމަތީގައި ފެށި ހަނގުރާމައިގެ ސަބަބުންނާއި އެކި ސަބަބުތަކާހުރެ މި އަަހަރުގެ ރަމަޟާން މަހު، އުމްރާގެ އަޅުކަމަށް ނުފުރި ތިބި ފަރާތްތަކަށް، ރައީސް ޑރ. މުހައްމަދު މުއިއްޒުގެ އިރުޝަދުގެ ދަށުން ހާއްސަ އިންތިޒާމުތަކެއް ހަމަޖެއްސުމުގެ މަސައްކަތް މޯލްޑިވްސް ހައްޖު ކޯޕަރޭޝަނުން ފަށައިފި އެވެ.
ހައްޖު ކޯޕަރޭޝަނުން މިއަދު ނެރުނު ބަޔާނެއްގައި ވަނީ އެކި ގްރޫޕްތަކުގެ ހަވާލުގައި ރަމަޟާން އުމްރާއަށް ދިއުމަށް ނިންމާފައިވަނިކޮށް، ފްލައިޓުތައް ކެންސަލްވުމާއި، އެނޫންވެސް ދަތިތަކާ ހުރެ ފުރޭގޮތް ނުވެފައިވާ ފަރާތްތަކަށް، އެކަމަށްޓަކައި ފްލައިޓު ޗާޓަރު ކުރެވޭގޮތް ވެއްޖެނަމަ އެކަން ކުރުމާއި، އެ ކޮމޮޑޭޝަން ހަމަޖެއްސުމަށް ހައްޖު ކޯޕަރޭޝަނުން މަސައްކަތްތަކެއް ކުރަމުން އަންނަ ކަމަށެވެ.
އެހެންކަމުން މި ރަމަޟާން މަހު އުމްރާގެ އަޅުކަން އަދާކުރުމަށް އެދި، ދިމާވި އެކި ސަބަބުތަކާ ހުރެ ނުފުރި ތިބި ފަރާތްތަކުގެތެރެއިން މި ފުރުސަތުގެ ބޭނުން ހިފަން ބޭނުންވާ ފަރާތްތަކުން މާދަމާ މެންދުރު 12:00ގެ ކުރިން އީމެއިލް އެޑްރެސް [email protected] އަށް މައުލޫމާތު ފޮނުވުމަށް ހައްޖު ކޯޕަރޭޝަނުގެ ބަޔާނުގައިވެއެވެ.
އެކި ކުންފުނިތަކުން އުމްރާއަށް ދިއުމަށް އުޅުނު ފަރާތްތަކަށް ނުފުރިފައި ވުމާއި ބައެއް ގައުމުތައް މެދުވެރިކޮށް ޓްރާންސިޓްކޮށް ފުރަން އުޅުނު ފަރާތްތަކަށް، އެގައުމުތަކުގެ ޕްލައިޓްތައް ކެންސަލްވުމުން ނުފުރިފަ ތިބި ފަރާތްތައް އުމްރާއަށް ފުރުވޭނެ ގޮތެއް ހޯދުމަށް ރައީސް ޑރ. މުއިއްޒު އިރުޝާދު ދެއްވާފައިވުމާއެކު، ފުރޭނެ ގޮތެއް ހޯދުމުގެ މަސައްކަތް އިސްލާމިކް މިނިސްޓްރީއާއި ހައްޖު ކޯޕަރޭޝަނާއި މޯލްޑިވިއަންއާ ގުޅިގެން ފަށާފައިވާ ވާހަކަ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުވެސް ވަނީ ވިދާޅުވެފައެވެ.
މިވަގުތާ ހަމައަށް 150 މީހުން ފުރަން ބޭނުންވެފައި ތިބިކަން ފާހަގަކުރެވިފައިކަމަށާއި، ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މީގެ އިތުރުން ވެސް ޖާގަ ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެކަމަށް ޝަހީމް ވިދާޅުވިއެވެ.
ވަގުތު ކުޑަތަންވެފައިވުމުން މިކަމުގައި ހުރި ދަތިތައް ހައްލުވޭތޯ މަސައްކަތްކުރަމުން އަންނަކަމަށްވެސް މިނިސްޓަރު ވިދާޅުވިއެވެ.
ކިޔުންތެރިންގެ ހިޔާލު