ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެފައިވަނީ، މޯލްޑިވްސް އިމިގްރޭޝަންގެ ޚިދުމަތްތައް ޑިޖިޓަލައިޒްކުރުމާއެކު، ބިދޭސީންގެ އައިޑީ ދެނެގަތުމާއި ޕާސްޕޯޓް ޚިދުމަތްތަކަށް އިންގިލާބީ ބަދަލެއް އަންނާނެ ކަމަށެވެ. މި ބަދަލުތަކުގެ ސަބަބުން ރައްޔިތުންނާއި ދައުލަތުގެ މުއައްސަސާތަކަށްވެސް ފަސޭހަތަކެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.
ވަޒީރު ޢަލީ އިޙްސާން މިހެން ވިދާޅުވީ، މޯލްޑިވްސް 2.0ގެ ދަށުން މޯލްޑިވްސް އިމިގްރޭޝަންގެ ޚިދުމަތްތައް ޑިޖިޓަލައިޒްކުރުން އިފްތިތާޙުކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސުލްޖުމްހޫރިއްޔާ އިފްތިތާޙުކުރައްވާފައިވާ މޯލްޑިވްސް 2.0 ޑިޖިޓަލައިޒޭޝަން ސިޔާސަތުގެ ދަށުން، ކަނޑައެޅިފައިވާ މުއައްދަތުގެ ތެރޭގައި ހުރިހާ މުއައްސަސާއެއްގެ ޚިދުމަތްތައް ޑިޖިޓަލައިޒްކުރުން މުހިންމުކަން ވަޒީރު ފާހަގަކުރެއްވިއެވެ.
އިމިގްރޭޝަންގެ ޚިދުމަތްތައް ޑިޖިޓަލައިޒްކުރެވިގެންދާއިރު، އެ ތަނުން ފޯރުކޮށްދޭ ޚިދުމަތްތަކަށް އިންގިލާބީ ބަދަލެއް އައިސް، ޚިދުމަތްތައް ހޯދުމަށް ރައްޔިތުންނަށް ވަރަށް ބޮޑަށް ފަސޭހަވާނެކަމަށް ވަޒީރު ވިދާޅުވިއެވެ. އެގޮތުން ބިދޭސީންގެ އައިޑީ ދެނެގަތުމާއި ވިސާ ހެއްދުން ފަދަ ޚިދުމަތްތައް ވަރަށް ބޮޑަށް ފަސޭހަވާނެކަން ވަޒީރު ފާހަގަކުރެއްވިއެވެ.
ވަޒީރު އިޙްސާން ވިދާޅުވީ، “އައިޑީ ޗެކަރ” ގެ ނަމުގައި ތަޢާރަފްކުރެވޭ އެޕްލިކޭޝަނަކީ ލޭބަރ ރިލޭޝަންސް އޮތޯރިޓީ (އެލް.އާރް.އޭ)، ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) ފަދަ ތަންތަނަށްވެސް އެކްސެސް ދެވޭނެ އެޕްލިކޭޝަނެއް ކަމަށެވެ. މީގެ ކުރިން ރަށްރަށުގައި ތިބޭ ކައުންސިލްތަކުން ބިދޭސީންގެ ސައިޓް މޮނިޓަރކުރާއިރު، އެ މީހުންނަކީ ކޮން ބައެއްކަން ކަށަވަރުކުރެވޭނެ މަގެއް ނެތް ކަމަށާއި، ނަމަވެސް މިކަންކަމަށް ޑިޖިޓަލައިޒްވުމާއެކު ހައްލު ލިބިގެންދާނެ ކަމަށް ވަޒީރު އިޙްސާން ވިދާޅުވިއެވެ.
ވަޒީރު އިތުރަށް ވިދާޅުވީ، ބައެއްފަހަރު ބިދޭސީން ނިޔާވެގެން ހޮސްޕިޓަލަށް ގެންދާއިރު، ނުވަތަ ބޭސްފަރުވާގެ ޚިދުމަތް ހޯދާއިރު އެއީ ކާކުކަން ދެނެގަތުމަށް ބޮޑެތި ދަތިތަކެއް ދިމާވާ ކަމަށެވެ. މިކަމަށް އެތައް ވަގުތެއް ހޭދަވި ނަމަވެސް، މިހާރު ކުޑަ ވަގުތު ކޮޅެއްގެ ތެރޭގައި ކާކުކަން ދެނެގަނެވުމުގެ މަގު މި ޑިޖިޓަލައިޒޭޝަންގެ ސަބަބުން ފަހިވެފައިވާކަން ވަޒީރު ފާހަގަކުރެއްވިއެވެ.
ކިޔުންތެރިންގެ ހިޔާލު