ދިވެހިންގެ ތެރޭގައި ވެސް ވަރަށް މަގުބޫލު ފެހި ކުލައިގެ ފުޅިއެއްގައި ހުންނަ ‘ހޮންގް ތައި ފޯމިއުލާ 2 ހާބަލް އިންހޭލާ’ގެ ބެޗެއް ތަގައްޔަރުވުމުން ތައިލެންޑުގެ ފުޑް އެންޑް ޑްރަގް އޮތޯރިޓީ (އެފްޑީއޭ) އިން އެ ބޭސްފުޅިތައް ފިހާރަތަކުން ނަގަން އަންގައިފި އެވެ. އެފްޑީއޭ އިން ކުރި ޓެސްޓްތަކުން ދައްކައިދީފައިވަނީ މި ބޭސްފުޅީގައި ރައްކާތެރި މިންވަރަށް ވުރެ ބޮޑަށް ‘މައިކްރޯބިއަލް ކޮންޓެމިނޭޝަން’ ހުރިކަން ކަމަށެވެ.
9 ޑިސެމްބަރު 2024ގައި އުފައްދާފައިވާ ޕްރޮޑަކްޝަން ނަމްބަރު 000332ގެ ބެޗުގައި 200،000 ފުޅި ހިމެނޭއިރު، އެއީ ހަމައެކަނި ތައިލެންޑުގައި ވިއްކާފައިވާ ބެޗެއް ކަމެއް ކުންފުނިން ޔަގީން ނުކުރެ އެވެ. ހޮންގް ތައި ހާބަލް އިން ބުނީ އެފްޑީއޭގެ އެންގުމާ އެއްގޮތަށް އެ ބެޗް ފިހާރަތަކުން ނަގަން ވަނީ ފަށައިފައިވާ ކަމަށާއި މުސްތަގުބަލުގައި އެފަދަ މައްސަލައެއް ދިމާނުވާނެހެން އަލްޓްރާ ވައިލެޓް ސްޓެރިލައިޒޭޝަން ފަދަ އިތުރު ކޮލިޓީ ކޮންޓްރޯލް ފިޔަވަޅުތައް ގެންގުޅުމަށް ނިންމާފައިވާ ކަމަށެވެ.
މި ބޭސް މަގުބޫލު ގައުމުތަކުގެ ތެރެއިން ސިންގަޕޫރުން ވެސް ވަނީ އާއްމުން މި ތަގައްޔަރުވެފައިވާ ބެޗުގެ ބޭސް ބޭނުންނުކުރުމަށް އިލްތިމާސްކޮށްފަ އެވެ. ތައިލެންޑުގައި ކޮލިޓީ ދަށް ހާބަލް ޕްރޮޑަކްޓެއް އުފައްދައިފިނަމަ ދެ އަހަރު ދުވަހުގެ ޖަލު ހުކުމެއް ނުވަތަ 200،000 ބާތުގެ (ގާތްގަނޑަކަށް 6،170 ޑޮލަރު) ޖޫރިމަނާއެއް ކުރެވޭނެ އެވެ.
ކިޔުންތެރިންގެ ހިޔާލު