ރަށްރަށުގެ ހިއްކި ބިންތަކުގައި ޔުޓިލިޓީ ހިދުމަތްތައް ގާއިމުކުރުމަށް އަންނަ އަހަރުގެ ބަޖެޓުގައި ހިމަނައިގެން ބޮޑު ޕްރޮގްރާމެއް ފައްޓަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ބ. އަތޮޅަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން އޭދަފުށީގައި މިރޭ ބޭއްވި ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ ގިނަ ރަށްތަކުގައި ހުރީ ހިއްކި ބިންތަކުގައި އެއްވެސް ކަމެއް ނުކުރެވި ކަމަށެވެ.
ގޯއްޗެއް ދިނަސް، ވިޔަފާރިއެއް ފަށަން އުޅުނަސް، ކަރަންޓާއި ފެނާއި ނަރުދަމާ އަދި އެހެންވެސް ހިދުމަތެއް ގާއިމުކުރެވިފައި ނުވާ ކަމަށާއި އެއީ އެތައް އަހަރެއް ވެފައި އޮތް މައްސަލައެއް ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ އަންނަ އަހަރަށް ބަޖެޓު ހަދާނީ އެކަމަށް ހާއްސަ ޕްރޮގްރާމެއް ހިމަނައިގެން ކަމަށާއި އަންނަ އަހަރުގެ ބަޖެޓު ހަދާ އިރުގައި، ހާއްސަ ނިއު އިނީޝިއޭޓިވް ޕްރޮގްރާމެއް ހިމަނުއްވާނެ ކަމަށެވެ.
“ހިއްކާފައި ހުރި ބިންތަކަށް ބޭނުންވާ ޔުޓިލިޓީސް ގާއިމުކޮށްދިނުމާއި، އިންފްރާސްޓްރަކްޗާ ގާއިމުކޮށްދިނުމުގެ މަޝްރޫއެއް ހިމަނާފައި،” އެ މަނިކުފާނު ވިދާޅުވިއެވެ.
ރައީސް ވިދާޅުވީ އެ ޕްރޮގްރާމުގެ ތެރެއިން އެންމެ އިސްކަންދޭނީ އާބާދީ އާއި ތަރައްގީ އެއްފަސްކުރެވޭނެ ރަށްތަކާއި އާބާދީ ބޮޑެތި ރަށްތަކަށް ކަމަށާއި މިއަހަރު ވެސް އޭގެ ތެރެއިން ފޭސްއެއް ފެށެން އޮތްތޯ ބަލައި ފަށަން މަސައްކަތްކުރައްވާނެ ކަމަށެވެ.
ކިޔުންތެރިންގެ ހިޔާލު