2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރެއްވުމުގެ ވިސްނުން ގެންގުޅުއްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިކަން ޙިއްސާ ކުރަށްވާފައި ވަނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އިސް މެންބަރުންނަށް ފޮނުއްވި މެސެޖެއްގައެވެ. ނަމަވެސް އިންތިހާބުގައި ވާދަކުރަށްވާނީ ކޮން ޕާޓީއެއްގެ ޓިކެޓެއް ގައިކަމެއް އެ މަނިކުފާނު ހާމަކުރައްވާފައެއް ނުވެއެވެ.
“އަޅުގަނޑު ކުރިމަތިލުމުގެ ވިސްނުން އެބަ ގެންގުޅެން. ކިހިނެއްތޯ ފެންނަނީ؟ ކޮންމެ ގޮތަކަށް ޖަވާބު ދެއްވި ނަމަވެސް އަޅުގަނޑުމެންގެ ގުޅުމަށް ބުރޫ ނާރާނެ،” ރައީސް ނަޝީދުގެ މެސެޖުގައިވެއެވެ.
Advertisement
ރައީސް ނަޝީދު އެމްޑީޕީގެ މެންބަރުންނަށް މިފަދަ މެސެޖެއް ފޮނުއްވާފައިވާއިރު، އެމަނިކުފާނު ވަނީ، 2023 ވަނަ އަހަރު އެމްޑީޕީން ވަކިވެވަޑައިގެން ދަ ޑިމޮކްރެޓްސް އަށް ސޮއި ކުރަށްވާފައެވެ.
އެމަނިކުފާނަކީ ރާއްޖޭގައި އެންމެ ފުރަތަމަ ބޭއްވި ގިނަ ޕާޓީ އެކުލެވޭ ރިޔާސީ އިންތިހާބު ކާމިޔާބު ކުރެއްވި ބޭފުޅާއެވެ. އެގޮތުން 2008 ވަނަ އަހަރު އުފެދުނު އެމަނިކުފާނުގެ ވެރިކަން ނިމުނީ 2012 ފެބްރުއަރީ 7 ގައި އެމަނިކުފާނު ވެރިކަމުން އިސްތިޢުފާ ދެއްވުމުންނެވެ.
އޭގެފަހުން ރައްޔިތުންގެ މަޖިލީހުގެ ރައީސްގެ މަޤާމުވެސް 19 ވަނަ މަޖިލީހުގައި އެމަނިކުފާނު އަދާކުރަށްވާފައިވެއެވެ. ރައީސް ނަޝީދު މިހާރު ހުންނެވީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަގާމުގަ އެވެ.
ކިޔުންތެރިންގެ ހިޔާލު