ސްޓެލްކޯގެ މެނޭޖިން ޑިރެކްޓަރުކަމުގެ މަގާމާ ހަވާލުވެވަޑައިގެންނެވުމަށްފަހު ފުލެޓެއް ބައްލަވައިގެންފައިވާ ކަމަށްބުނެ ފަތުރަމުންދާ ވާހަކަތައް ސްޓެލްކޯގެ އެމްޑީ ހުސައިން ފަހުމީ ދޮގުކުރައްވައިފިއެވެ.
ސޯޝަލް މީޑިއާގައި ދެކެވޭ އެ ވާހަކަތަކާ ގުޅިގެން އެކްސްގައި ފަހުމީ ކުރެއްވި ޕޯސްޓެއްގައި ވިދާޅުވީ އެ ދޮގު ވާހަކަ ފަތުރާ ފަރާތްތަކުން އިޝާރާތްކުރާ ފުލެޓަކީ، ކުރީގެ ރައީސް ޔާމީންގެ ވެރިކަމުގައި، މީގެ އަހަރުތަކެއް ކުރިން ގަނެ، ފައިސާދައްކަމުން އައިސްފައިވާ ފުލެޓެއް ކަމަށެވެ.
“ސްޓެލްކޯގެ މެނޭޖިން ޑިރެކްޓަރުގެ މަގާމާ ހަވާލުވުމަށްފަހު 8.5 މިލިއަން ރުފިޔާއަށް ފުލެޓެއް ގަތްކަމަށް ބުނެ، ބައެއް ފަރާ ފަރާތްތަކުން އަޅުގަނޑުގެ އަބުރަށް އަރައިގަނެ، ސިޔާސީ މަގުސަދެއް ހާސިލުކުރުމަށް ފަތުރަމުންދާ ވާހަކައަކީ ހަގީގަތާ ހިލާފު، އަސާސެއް ނެތް ދޮގު ވާހަކައެއްކަން ދަންނަވަން،” ފަހުމީ ވިދާޅުވިއެވެ.
ސްޓެލްކޯގެ އެމްޑީ ފަހުމީ ވިދާޅުވީ ސިޔާސީ މަގުސަދެއް ހާސިލުކުރުމަށް ނަމަވެސް، މީހުންގެ އަބުރަށް ހުތުރުވާ ފަދަ، އެފަދަ ދޮގު ވާހަކަތައް އުފައްދައި ފަތުރަމުންދާ ފަރާތްތަކުން އެކަން ވަގުތުން ހުއްޓާލުމަށް އިލްތިމާސްކުރައްވާ ކަމަށެވެ
ނަމަވެސް، ސިޔާސީ ގޮތުންނާއި އަދި އެ ނޫން ގޮތަކުން ވިޔަސް، ސްޓެލްކޯގެ މެނޭޖިން ޑިރެކްޓަރުގެ މަގާމުގައި ހުންނަވައި ކުރައްވަމުން ގެންދަވާ ގައުމީ މަސައްކަތާ ގުޅުވައިގެން ދެކެވޭ ބިނާކުރަނިވި ފާޑުކިޔުންތަކަށް އަބަދުވެސް އިހުތިރާމުކޮށް، މަރުހަބާ ކިޔާނެ ކަމަށް ފަހުމީ ވިދާޅުވިއެވެ.
ކިޔުންތެރިންގެ ހިޔާލު